نئی دہلی//راجیہ سبھا کے چیئرمین جگدیپ دھنکھر نے آج کہا کہ اراکین پارلیمنٹ کو ایوان میں صرف وہی باتیں کرنی چاہئیں جو ملک کے مفاد میں ہوں اور جسے تصدیق کیاجاسکے ۔
صدر کے خطاب پر شکریہ کی تحریک پر بحث کے دوران مسٹر دھنکھر نے اپوزیشن لیڈر ملکارجن کھرگے کے ذریعہ حکومت پر لگائے گئے الزامات پر کہا کہ اراکین الزامات کو ثابت نہیں کرسکتے ہیں۔ انہوں نے کہا کہ کچھ سینئر لوگ ہمارے شفاف مضبوط نظام کو گرانے کے لیے پارلیمنٹ کا غلط استعمال نہیں کر سکتے ۔
اس کے بعد مسٹر کھرگے نے کہا کہ اگر وہ سچ بولتے ہیں تو وہ ملک مخالف ہو جاتے ہیں۔ انہوں نے کہاکہ ”میں زمیں سے جڑا ہوں۔ میں کسی دوسرے ملک سے نہیں آیا ہوں۔ مجھے دبانے کی کوشش مت کریں۔’’
اس پر مسٹر دھنکھر نے کہا کہ ہم سب محب وطن ہیں۔ یہ پہلی بار ہو رہا ہے کہ چیئر کی بے عزتی ہو رہی ہے ۔ انہوں نے کہا کہ میں آئین سے جڑا ہوا ہوں۔ نہ کسی کے حق میں نہ کسی کے خلاف۔’’
