جموں//
چیف آف ڈیفنس اسٹاف(سی ڈی ایس) جنرل انیل چوہان‘جو جموں و کشمیر کے دو روزہ دورے پر تھے، نے آج یہاں ایک اعلیٰ سطحی سیکورٹی میٹنگ کی صدارت کی۔
جنرل چوہان نے بتایا کہ میٹنگ میں ادھم پور میں مقیم شمالی فوج کے کمانڈر لیفٹیننٹ جنرل اوپیندر دویدی اور پولیس کے ڈائریکٹر جنرل دلباغ سنگھ نے بھی شرکت کی۔
جموں زون کے ایڈیشنل ڈائریکٹر جنرل آف پولیس‘ مکیش سنگھ اور جموں میں قائم ۱۶ویںکور کے جنرل آفیسر کمانڈنگ ‘جسے وائٹ نائٹ کور بھی کہا جاتا ہے، لیفٹیننٹ جنرل سندیپ جین اور جنرل آفیسر کمانڈنگ ۲۶ انفنٹری ڈویڑن میجر جنرل گورو گوتم نے بھی میٹنگ میں شرکت کی۔
چیف آف ڈیفنس اسٹاف نے اپنے دورے کے پہلے دن کشمیر میں آگے کے علاقوں اور اندرونی علاقوں کا دورہ کیا اور انہیں فیلڈ افسران کی طرف سے سیکورٹی کی صورتحال کے بارے میں بریفنگ دی گئی۔
حکام نے بتایا کہ آج صبح جموں پہنچنے پر جنرل چوہان کا ائیر آفیسر کمانڈنگ، ائیر فورس سٹیشن جموں، ائیر کموڈور جی ایس بھولر نے استقبال کیا۔
وزارت دفاع کے پرنسپل ترجمان‘بھارت بھوشن بابو نے ٹویٹ کیا’’سی ڈی ایس جنرل انیل چوہان شمالی کمان کے ساتھ، لیفٹیننٹ جنرل اپیندر دویدی جموں پہنچے۔ سی ڈی ایس نے ایک اعلیٰ سطحی سیکورٹی میٹنگ کی صدارت کی جس میں شمالی کمان کے سربراہ‘ڈی جی پی جموں کشمیر پولیس دلباغ سنگھ‘اے ڈی جی پی ‘ لیفٹیننٹ جنرل سندیپ جین جی او سی ۱۶ویں کوراور جی او سی۲۶ انفنٹری ڈیویژن نے شرکت کی‘‘۔
حکام نے بتایا کہ جنرل چوہان بعد میں نگروٹا چھاؤنی کا دورہ کرنے کے بعد دہلی واپس لوٹ گئے۔
اس سے پہلے چیف آف ڈیفنس سٹاف نے جمعرات کو کشمیرمیںایل او سی کا دورہ کیا ۔
سی ڈی ایس نے آفیسران سے کہا کہ ہمہ وقت متحرک، چاک و چوبند رہنے کی ضرورت ہے ۔
دفاعی ترجمان نے ٹویٹ کے ذریعے جانکاری دیتے ہوئے بتایاکہ چیف آف ڈیفنس سٹاف جنرل انیل چوہان نے جمعرات کے روز پاکستان کے ساتھ لگنے والی سرحدوں کا دورہ کیا اور وہاں فوجی تیاریوں کے بارے میں آگاہی حاصل کی۔انہوں نے بتایا کہ سی ڈی ایس کے ہمراہ ناردرن کمانڈر لیفٹیننٹ جنرل اوپندر دیودی بھی تھے ۔
اُن کے مطابق سی ڈی ایس کو جموں وکشمیر کی سیکورٹی صورتحال کے بارے میں بھی مکمل جانکاری فراہم کی گئی ۔
ایک میڈیا رپورٹ کے مطابق دورے کے دوران سی ڈی ایس کو دراندازی کی کوششوں کے پیش نظر متعلقہ علاقوں میں ذمہ داریوں اور حفاظتی تیاریوں کے بارے میں جانکاری دی گئی۔ سی ڈی ایس نے فوجی جوانوں سے بھی تبادلہ خیال کیا اور تندہی وپیشہ وارانہ انداز سے اپنے فرائض انجام دینے پر ان کی سراہنا کی۔ سیکورٹی چیلنجوں سے موثر طریقہ سے نپٹنے کیلئے کی جارہی تیاریوں پر بھی سی ڈی ایس نے زور دیا۔
جنرل چوہان نے تمام افسران واہلکاران سے کہاکہ ہمہ وقت متحرک ، چاک وچوبند رہنے کی ضرورت ہے تاکہ دشمن کے ارادوں کو ناکام بنایا جا سکے ۔