ہندوستان ٹیم سے باہر رکھے گئے کھلاڑیوں کو موقع دے سکتا ہے

احمد آباد// نیوزی لینڈ کے خلاف سیریز 1-1 سے برابر ہونے کے بعد بدھ کو ہونے والے تیسرے اور فیصلہ کن ٹی 20 میچ کے لیے ہندوستان ان کھلاڑیوں کو الیون میں شامل کر سکتا ہے، جنہیں ابھی تک سیریز میں موقع نہیں ملا ہے۔
ہندوستان نے اکانا اسٹیڈیم کی مشکل پچ پر نیوزی لینڈ کے خلاف پانچ وکٹوں سے جیت درج کی، لیکن اس دوران بیٹنگ سے متعلق کئی خامیاں سامنے آئیں۔
نیوزی لینڈ کی جانب سے دیے گئے 99 رنز کے چھوٹے ہدف کا تعاقب کرنے کے لیے ہندوستان جب اترا تو اوپنر شبھمن گل صرف 11 رنز بنا کر پویلین لوٹ گئے۔ کافی دیر تک جدوجہد کرنے کے بعد ایشان کشن بھی 32 گیندوں پر 19 رنز بنانے کے بعد پویلین کا رخ کیا۔
دونوں سلامی بلے باززیادہ تراپنے ٹی 20 کیریئر میں فارمیٹ کے تقاضوں کو پورا کرنے میں معذورنظر آئے ہیں۔ گل نے پانچ ٹی ٹوئنٹی انٹرنیشنل میچوں میں 15.2 کی اوسط اور 128.81 اسٹرائیک ریٹ سے 76 رنز بنائے ہیں، جبکہ کشن نے 26 میچوں میں 26.08 کی اوسط اور 123.25 کے اسٹرائیک ریٹ سے652 رنز بنائے ہیں۔
ہندوستان دورہ نیوزی لینڈ کے اختتام سے قبل ایک بار دھماکہ خیز اوپنر پرتھوی شا کو موقع دے سکتا ہے۔ ڈومیسٹک کرکٹ اور انڈین پریمیئر لیگ (آئی پی ایل) میں اپنے کارناموں کے باوجود، شا کو کبھی بھی ٹی 20 انٹرنیشنل میں اپنے جوہر دکھانے کا موقع نہیں ملا۔ انہوں نے اپنے کیریئر میں واحد ٹی ٹوئنٹی انٹرنیشنل کھیلا، وہاں بھی ان کی بیٹنگ نہیں آئی۔
جہاں پرتھوی شا شبھمن گل کی جگہ اننگ کا آغاز کر سکتے ہیں، وہیں وکٹ کیپر ایشان کے دستانے جیتیش سنگھ کے حوالے کیے جا سکتے ہیں۔ گھریلو ٹی20 میں 147.93 کے اسٹرائیک ریٹ کے ساتھ رن بنانے والے جیتیش فنشر کے کردار کے لیے ایک اچھا آپشن ہو سکتے ہیں۔
ٹیم انتظامیہ کو دیپک ہڈا کو اوپری آرڈر میں جگہ دینے پر بھی غور کرنا چاہیے۔ ہڈا کی مہارت درمیانی اوورز میں اسپنرز کے خلاف جارحیت دکھانا ہے لیکن موجودہ ہندوستانی الیون میں انہیں چھٹے ساتویں نمبر پر بلے بازی کا موقع ملتا ہے۔ ہڈا نے آئرلینڈ کے خلاف اپنی واحد ٹی20 انٹرنیشنل سنچری بھی تیسرے نمبر پر بیٹنگ کرتے ہوئےبنائی۔ اگر پانڈیا کی ٹیم تیسرے ٹی 20 میں گل-کشن کی جوڑی کو آرام دیتی ہے تو ہڈا کو اپرآرڈر میں آزمایا جا سکتا ہے۔
دوسری طرف، ہندوستان میں تاریخی ٹی20 سیریز جیتنے سے ایک قدم دورنیوزی لینڈ بھی اعتماد سے لبریز ہوگا۔ مچل سینٹنر بطور کپتان بہت تخلیقی رہے ہیں۔ یہاں تک کہ انہوں نے لوکی فرگوسن کو لکھنؤ ٹی 20 میں اسپن بولنگ کرنے کو کہا تاکہ پچ
کو پوری طرح استعمال کیا جاسکے۔ کپتان سینٹنر بین الاقوامی سطح پر اب تک 12 میں سے 10 ٹی ٹوئنٹی میچ جیتنے میں کامیاب رہے ہیں۔ وہ ہندوستان کو اسی کی سرزمین پر شکست دے کر اپنے نام کے ساتھ ایک نادر کامیابی شامل کرنا چاہیں گے۔
احمد آباد کا نریندر مودی اسٹیڈیم اب تک بلے بازوں کے لیے مددگار ثابت ہوا ہے۔ یہاں کھیلے گئے آخری پانچ میں سے تین ٹی20 انٹرنیشنل مقابلوں میں دونوں ٹیمیں 160 سے زیادہ رن بنانے میں کامیاب رہی ہیں اور اوس کو ذہن میں رکھتے ہوئے، کپتان پانڈیا ٹاس جیتنے کے بعد پہلے گیند بازی کر سکتے ہیں۔ بدھ کو احمد آباد میں موسم صاف رہنے کی امید ہے اور اگر سب کچھ ٹھیک رہا تو ہندوستانی ٹیم میچ جیت کر سیریز جیتنا چاہے گی۔