نئی دہلی// لوک سبھا کے اسپیکر اوم برلا نے بجٹ اجلاس سے قبل آج پارلیمنٹ ہاؤس کے احاطے کا معائنہ کیا۔ انہوں نے لوک سبھا سکریٹریٹ، سی پی ڈبلیو ڈی اور دیگر ایجنسیوں کے عہدیداروں کے ساتھ پارلیمنٹ ہاؤس کمپلیکس میں لوک سبھا چیمبر، سینٹرل ہال، کوریڈور، لابی، ویٹنگ روم اور دیگر مقامات کا معائنہ کیا۔
اجلاس کے دوران صفائی کے اعلیٰ ترین معیار کو برقرار رکھنے پر زور دیتے ہوئے مسٹر برلا نے بجٹ سیشن کے خوشگوار انعقاد کو یقینی بنانے کے لیے تمام ایجنسیوں کو تال میل کے ساتھ کام کرنے کی ہدایت دی۔
مسٹر برلا نے پارلیمنٹ ہاؤس میں آئی ٹی ڈی سی کی طرف سے چلائی جانے والی کیٹرنگ سہولیات کا بھی معائنہ کیا۔ انہوں نے متعلقہ ایجنسیوں کو ضروری ہدایات دیں کہ وہ ارکین پارلیمنٹ، میڈیا، دونوں سیکرٹریٹ کے عہدیداروں اور دیگر مہمانوں کو صحت بخش اور غذائیت سے بھرپور کھانا فراہم کریں۔ انہوں نے کیٹرنگ کی سہولیات کی باقاعدگی سے صفائی کو یقینی بنانے کی بھی ہدایت کی۔
لوک سبھا اسپیکر نے پارلیمنٹ ہاؤس کمپلیکس میں سیکورٹی انتظامات کا بھی جائزہ لیا اور متعلقہ افسران کو ہدایت دی کہ وہ سیکورٹی کے اعلیٰ ترین معیار کو برقرار رکھتے ہوئے بغیر کسی روکاوٹ کے اراکین پارلیمنٹ کی آمد و رفت کو یقینی بنائیں۔
نئے پارلیمنٹ ہاؤس کی تعمیر کا حوالہ دیتے ہوئے مسٹر برلا نے تمام متعلقہ ایجنسیوں کی طرف سے آلودگی پر قابو پانے اور دیگر اصولوں کی تعمیل پر زور دیا اور انہیں ہدایت دی کہ وہ اس بات کو یقینی بنائیں کہ تعمیراتی سرگرمیاں سیشن کے دوران پارلیمانی کام کاج میں رکاوٹ نہ بنیں۔ انہوں نے کہا کہ فضائی اور صوتی آلودگی کو کم کرنے کے لیے تعمیراتی مقام پر ضروری آلات نصب کیے جائیں۔