بی ایس ایف اور رینجرز میں مٹھائیوں کا تبادلہ

جموں//
بی ایس ایف اور پاکستان رینجرز نے جمعرات کو ہندوستان کے۷۴ ویں یوم جمہوریہ کے موقع پر جموں میں بین الاقوامی سرحد کے ساتھ مختلف چوکیوں پر مٹھائیوں اور مبارکبادوں کا تبادلہ کیا۔
عہدیداروں نے بتایا کہ بارڈر سکیورٹی فورس نے پاکستان رینجرز کو مٹھائی پیش کی اور انہوں نے اس کا جواب دیا۔
بارڈر سیکورٹی فورس کے ایک اہلکار نے بتایا کہ اکھنور، سانبہ، کٹھوعہ، ارنیا اور آر ایس پورہ میں سرحدی چوکیوں پر مٹھائیوں کا تبادلہ خوشگوار انداز میں ہوا۔
حکام کے مطابق، بھارتی فوج کے دستوں نے راجوری اور پونچھ اضلاع میں لائن آف کنٹرول (ایل او سی) کے ساتھ آگے کی پوسٹوں پر اپنے پاکستانی ہم منصبوں کے ساتھ مٹھائی اور مبارکباد کا تبادلہ بھی کیا۔یہاں سرحدی ہیڈکوارٹر میں یوم جمہوریہ منایا گیا۔
بی ایس ایف کے انسپکٹر جنرل ڈی کے بورا نے اس موقع پر ترنگا لہرایا اور بین الاقوامی سرحد اور کنٹرول لائن پر خدمات انجام دینے والے تمام ’سیما پرہاریوں‘ اور ان کے اہل خانہ کو اپنی نیک خواہشات کا اظہار کیا۔ انہوں نے بی ایس ایف کے جوانوں کی عظیم قربانیوں کو بھی یاد کیا۔
آئی جی نے کہا کہ بی ایس ایف نے ہمیشہ ہندوستانیوں کی حفاظت کو یقینی بنانے کے لیے تمام چیلنجوں کا مضبوطی سے سامنا کیا ہے اور وہ ہمیشہ ملک کی سلامتی کیلئے پرعزم رہے گی۔