فوج میں۱۰۸خواتین افسران کو کرنل بنا کر کمانڈ کی ذمہ داری دی جائے گی

نئی دہلی//
فوج میں خواتین افسران کو مستقل کمیشن دینے کے بعد پہلی بار لیفٹیننٹ کرنل سے کرنل کے عہدے پر ترقی دینے کیلئے خصوصی خواتین نمبر۳سلیکشن بورڈ میں۲۴۴خواتین افسران کے انتخاب کا عمل جاری ہے ، جس میں۱۰۸خواتین افسران کا انتخاب کرکے انہیں کمانڈ سنبھالنے کی ذمہ داری دی جائے گی۔
فوج کے ذرائع کے مطابق یہ سلسلہ گزشتہ۹ جنوری کو شروع ہوا تھا اور۲۲جنوری تک جاری رہے گا۔
اس سلیکشن بورڈ میں انجینئرز، سگنلز، آرمی ایئر ڈیفنس، انٹیلی جنس کور، آرمی سروس کور، آرمی آرڈیننس کور اور الیکٹریکل اینڈ مکینیکل انجینئر کور جیسی شاخوں کے۱۹۹۲سے۲۰۰۶بیچ کے افسران کو موقع دیا گیا ہے ۔
اس کا مقصد خواتین کو فوج میں مرد افسروں کے برابر مواقع فراہم کرنا ہے ۔ اس کیلئے حکومت نے خصوصی طور پر خالی آسامیوں کا اعلان کیا ہے ۔
سلیکشن بورڈ کے عمل میں شفافیت کو یقینی بنانے کیلئے۶۰خواتین افسران کو بطور مبصر بلایا گیا ہے ۔ اگر سلیکشن کے عمل میں موزوں اور فٹ پائی گئی تو ان۱۰۸خواتین افسران کو کرنل کا رینک دیا جائے گا اور انہیں رواں ماہ کے آخر تک مختلف کمانڈز میں ذمہ داریاں سونپ دی جائیں گی۔