گریز اور سربل گاندربل میں برفانی تودا گر آئے‘ جانی یا مالی نقصان نہیں

سرینگر//
شمالی ضلع بانڈی پورہ کے تلیل گاؤں اور گاندربل کے سربل علاقے میں ہفتے کے روز ایک برفانی تودا گر آیا تاہم کسی کے جانی یا مالی نقصان کی کوئی اطلاع نہیں ہے ۔
سرکاری ذرائع نے بتایا کہ گریز کے تلیل علاقے میں ایک بھاری برکم برفانی تودا گر آیا۔انہوں نے کہا کہ تاہم اس واقعے میں کسی جانی یا مالی نقصان کی کوئی اطلاع نہیں ہے ۔
معلوم ہوا ہے کہ متعدد ٹیموں کو جائے وقوع کی اور روانہ کیا گیا اور اس سلسلے میں مزید تفصیلات کا انتظار ہے ۔
دریں اثنا حکام علاقے میں تازہ صورتحال پر کڑی نگاہ رکھے ہوئے ہیں۔ایک سرکاری عہدیدار کے مطابق علاقے کو احتیاطی طور پر بند کر دیا گیا ہے اور لوگوں سے تاکید کی گئی ہے کہ وہ گھروں سے غیر ضروری باہر نکلنے سے احتراز کریں۔انہوں نے کہا کہ حکام نے لوگوں کو مدد کیلئے ایمرجنسی ہیلپ لائن نمبرس بھی فراہم کئے ہیں۔
دوسری جانب ہفتے کے روز وسطی کشمیر کے گاندربل ضلع کے سربل علاقے میں کم شدت والا برفانی تودہ گرا، جہاں ایک تعمیراتی کمپنی نے ورکشاپس بنا رکھی ہیں۔ تاہم فوری طور پر کسی جانی یا مالی نقصان کی کوئی اطلاع نہیں ملی۔
ایک پولیس اہلکار نے بتایا کہ حیدرآباد کی ایک کمپنی میگھا انجینئرنگ اینڈ انفراسٹرکچر لمیٹڈ (ایم ای آئی ایل) نے اس علاقے میں ایک ورکشاپ بنائی ہے جہاں برفانی تودہ گرا تھا۔
عہدیدار نے کہا کہ پولیس اور ایس ڈی آر ایف صورتحال پر گہری نظر رکھے ہوئے ہیں۔
سوشل میڈیا پر شیئر کی گئی واقعے کی ویڈیوز میں، کارکنان کو علاقے میں برفانی تودے گرنے کے فوراً بعد خطرے کی گھنٹی بجاتے دیکھا جا سکتا ہے۔
یہ دوسرا موقع تھا جب اس علاقے میں برفانی تودے گرے۔ ۱۲ جنوری کو اس علاقے میں دو تعمیراتی کارکن برفانی تودے کے نیچے دب گئے تھے۔
بتادیں کہ ڈویژنل انتظامیہ نے ہفتے کے روز بھی بالائی علاقوں میں برفانی تودے گر آنے کی پیشین گوئی کی ہے جس کے پیش نظر لوگوں کو احتیاط برتنے کی تلقین کی گئی ۔