جموں//
جنرل آفیسر کمانڈنگ (جی او سی)۱۶ویں کور، لیفٹیننٹ جنرل‘ سندیپ جین نے آج یہاں پولیس ہیڈ کوارٹر میں ڈائریکٹر جنرل آف پولیس، جموں و کشمیر‘ دلباغ سنگھ سے ملاقات کی۔
ڈی جی پی اور جی او سی نے جموں بالخصوص سرحدی اضلاع میں مجموعی سیکورٹی صورتحال سے متعلق مختلف امور پر تبادلہ خیال کیا۔
پولیس کے ایک بیان میں کہا گیا ہے کہ افسران نے دہشت گردوں کے طریقہ کار پر تبادلہ خیال کیا۔ انہوں نے ڈرون کے ذریعے پاکستان کی طرف سے اسلحہ گولہ بارود اور منشیات گرانے کی کوششوں کو ناکام بنانے سمیت انسدادی اقدامات پر بھی تبادلہ خیال کیا۔
ڈی جی پی نے فوج، جموں کشمیر پولیس اور سی اے پی ایف کے درمیان تعاون کی تعریف کی جس نے جموں و کشمیر میں دہشت گردی کی کمر توڑنے میں مدد کی ہے۔
ذرائع کا کہنا ہے کہ میٹنگ کے دوران جموں صوبے کے سبھی اضلاع میں پولیس اسٹیشنوں اور فوجی تنصیبات کے ارد گرد سیکورٹی کو مزید چوکس کرنے کا بھی فیصلہ لیا گیا۔
بتادیں کہ سدھرا جموں میں چار ملی ٹینٹوں کی ہلاکت اور راجوری میں شہری ہلاکتوں کے بعد جموں میں ہائی الرٹ جاری کیا گیا ہے۔
سیکورٹی ذرائع کے مطابق امکانی حملوں کو ٹالنے کی خاطر جموں بھر میں ناکوں کا جال بچھایا گیا ہے جہاں پر ہر آنے جانے والے کی باریک بینی سے تلاشی لی جارہی ہیں۔
ذرائع کا کہنا ہے کہ جموں کے سرحدی علاقوں میں اضافی پیرا ملٹری فورسز کی تعیناتی کا بھی فیصلہ لیا گیا ہے اور۱۸پیراملٹری فورسز کی کمپنیوں کو سرحدی علاقوں میں تعینات کرنے پر رضامندی جتائی گئی۔