بلنڈیل ، ہنری کی نصف سنچریوں سے نیوزی لینڈ نے برتری حاصل کی

کراچی// ٹام بلنڈیل (51) اور میٹ ہنری (ناٹ آؤٹ 68) کی نصف سنچریوں کی بدولت نیوزی لینڈ نے منگل کو پاکستان کے خلاف دوسرے ٹیسٹ کی پہلی اننگز میں 449 رن بنائے۔ پاکستان نے دن کا کھیل ختم ہونے سے قبل تین وکٹوں کے نقصان پر 154 رن بنا لیے تھے۔
بلنڈیل اور ہنری کے علاوہ اعجاز پٹیل نے 35 رن بنائے، جب کہ پاکستان کی جانب سے ابرار احمد نے چار اور آغا سلمان اور نسیم شاہ نے تین، تین وکٹیں حاصل کیں۔
نیوزی لینڈ نے دوسرے دن کا آغاز 309/6 کے اسکور سے کیا اور بغیر کوئی رن بنائے ایش سوڈھی (11) کی وکٹ گنوا دی۔ نیوزی لینڈ آل آؤٹ ہونے کے راستے پر تھا لیکن بلنڈل، ہنری اور پٹیل کی اننگز نے پاکستان کی مشکلات میں اضافہ کرنے کا کام کیا۔
بلنڈل نے اپنے کیریئر کی آٹھویں نصف سنچری بناتے ہوئے کپتان ٹم ساؤتھی کے ساتھ 31 رن جوڑے ۔ بلنڈل نے 108 گیندوں پر چھ چوکوں کی مدد سے 51 رن بنائے جبکہ ساؤتھی نے 10 رن کا حصہ ڈالا۔ ابرار نے دونوں بلے بازوں کو آؤٹ کیا۔
اس کے بعد ہنری نے پٹیل کے ساتھ مل کر 10ویں وکٹ کے لیے 104 رن کی زبردست شراکت داری کی۔ یہ ٹیسٹ کرکٹ کی تاریخ میں 10ویں وکٹ کے لیے 27ویں سنچری شراکت ہے۔ ہنری پٹیل کے درمیان 25 اووروں تک جاری رہنے والی اس شراکت نے نیوزی لینڈ کو مضبوط اسکور تک پہنچانے کے ساتھ ساتھ پاکستانی کھلاڑیوں کو تھکانے کا کام بھی کیا۔ ہنری نے 81 گیندوں پر آٹھ چوکوں اور دو چھکوں کی مدد سے ناٹ آوٹ 68 رن بنائے جبکہ پٹیل نے ابرار کا شکار ہونے سے قبل 78 گیندوں پر چار چوکوں کی مدد سے 35 رن بنائے۔
پاکستان نے بڑے اسکور کے جواب میں عبداللہ شفیق (19) اور شان مسعود (20) کی وکٹیں جلدی گنوا دیں۔ بابر اعظم (24) اچھی لے میں نظر آرہے تھے لیکن اوپنر امام الحق سے تال میل کھونے کے بعد رن آؤٹ ہوگئے۔
پانچویں نمبر پر بیٹنگ کے لیے آنے والے سعود شکیل نے پہلا رن جوڑنے سے پہلے 41 گیندیں کھیل کر پاکستان کی اننگز کو ٹھہراو دیا۔
دن کے کھیل کے اختتام تک امام نے 74 جبکہ سعود نے 13 رن بنائے اور دونوں کے درمیان 55 رن کی شراکت داری ہو چکی ہے۔