۹سے۱۳دسمبر تک برفباری کے دو مرحلے متوقع:محکمہ موسمیات

سرینگر//
محکمہ موسمیات کے مطابق وادی کشمیر میں۹سے ۱۳دسمبر کے درمیان برف باری کے دو مرحلے متوقع ہیں۔
متعلقہ محکمے کے ڈپٹی ڈائریکٹر مختار احمد نے میڈیا کے ساتھ بات کرتے ہوئے کہا کہ وادی میں۸دسمبر تک موسم خشک رہنے کا امکان ہے ۔ انہوں نے کہا کہ بعد ازاں وادی میں۹؍اور۱۰دسمبر کے درمیان برف باری متوقع ہے ۔
احمد کا کہنا تھا’’برف باری کا یہ سلسلہ۹دسمبر کی شام سے شروع ہو کر ۱۰دسمبر کی صبح تک جاری رہ سکتا ہے اور اس دوران میدانی علاقوں میں ہلکی برف باری جبکہ بالائی علاقوں خاص کر کپوارہ، بانڈی پورہ، بارہمولہ اور بڈگام کے بالائی علاقوں، گاندربل، پیر کی گلی کے علاقوں میں ہلکی سے درمیانی درجے کی برف باری کا امکان ہے ‘‘۔
ڈپٹی ڈائریکٹر نے کہا کہ اس کے بعد وادی میں موسم خشک رہ سکتا ہے ۔انہوں نے کہا’’تازہ مغربی ہواؤں کی ایک اور کمزور لہر۱۲دسمبر کو وارد وادی ہوسکتی ہے جس کے نتیجے میں وادی کے کچھ علاقوں میں۱۲؍اور۱۳دسمبر کو ہلکی برف باری کا امکان ہے‘‘ ۔
احمد کا کہنا تھا کہ وادی میں بعد ازاں۱۷دسمبر تک موسم مجموعی طور پر خشک رہنے کا امکان ہے ۔انہوں نے کہا کہ وادی میں۱۳دسمبر تک شابنہ درجہ حرارت میں قدرے بہتری متوقع ہے تاہم دن کے درجہ حرارت میں گراوٹ درج ہوسکتی ہے ۔
اس دوران وادی میں چلہ کلان جیسی سردیوں کا زور برابر جاری ہے جس کے باعث جھیل ڈل کے کچھ حصے منجمند ہوگئے ۔
محکمہ موسمیات کے ایک ترجمان کے مطابق وادی میں شبانہ درجہ حرارت میں مزید گراوٹ درج ہوئی ہے اور سیاحتی مقام پہلگام سرد ترین جگہ رہی ہے ۔
پہلگام میں کم سے کم درجہ حرارت منفی۶ء۵ ریکارڈ ہوتے ہوئے رواں سیزن کی اب تک کی سرد ترین رات ریکارڈ ہوئی ہے ۔
دارلحکومت سرینگر میں کم سے کم درجہ حرارت منفی۰ء۳ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۲ء۲ڈگری سینٹی گریڈ ریکارڈ ہوا تھا۔
سرینگر میں۵دسمبر کو رواں سیزن کی سرد ترین رات ریکارڈ ہوئی تھی جب کم سے کم درجہ حرارت منفی۴ء۳ ڈگری سینٹی گریڈ ریکارڈ ہوا تھا۔
سیاحتی مقام گلمرگ میں کم سے کم درجہ حرارت منفی۰ء۴ڈگری سینٹی گریڈ ریکارڈ ہوا ہے جہاں گذشتہ شب کا درجہ حرارت منفی۵ء۳ڈگری سینٹی گریڈ ریکارڈ ہوا تھا۔
شمالی ضلع کپوارہ میں کم سے کم درجہ حرارت منفی۱ء۳ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی۷ء۲ڈگری سینٹی گریڈ ریکارڈ ہوا تھا۔
گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت منفی۶ء۳ڈگری سینٹی گریڈ ریکارڈ ہوا ہے جہاں گذشتہ شب کا کم سے کم درجہ حرارت منفی۲ء۲ڈگری سینٹی گریڈ ریکارڈ ہوا تھا۔
شبانہ درجہ حرارت نقطہ انجماد سے نیچے درج ہونے سے جہاں بدھ کی صبح جھیل ڈل کے کچھ اندرونی حصے جم گئے تھے وہیں دیگر ندی نالوں اور جھیل جھرنوں کے کناروں پر بھی پانی جم گیا تھا۔
محکمہ موسمیات کے ایک ترجمان کے مطابق مغربی ہواؤں کی ایک تازہ لہر۹دسمبر کو وارد وادی ہوسکتی ہے جس کے نتیجے میں وادی میں۹دسمبر کی شام سے۱۰دسمبر کی شام تک برف باری کا امکان ہے ۔
دریں اثنا وادی میں بدھ کو بھی صبح سے ہی موسم خشک رہا اور ہلکی دھوپ بھی چھائی رہی۔
لداخ یونین ٹریٹری کے ضلع کرگل میں کم سے کم درجہ حرارت منفی۶ء۱۱ڈگری سینٹی گریڈ جبکہ ضلع لیہہ میں منفی۰ء۱۱ڈگری سینٹی گریڈ ریکارڈ ہوا ہے ۔