2022 ویمنز ورلڈ کپ فائنل کے لیے میچ آفیشلز کا اعلان

کرائسٹ چرچ// انٹرنیشنل کرکٹ کونسل (آئی سی سی) نے جمعہ کے روز3 اپریل کو کرائسٹ چرچ کے ہیگلے اوول گراؤنڈ میں آسٹریلیا اور انگلینڈ کے درمیان ہونے والے 2022 ومینزورلڈ کپ فائنل کے لئے خواتین کے میچ آفیشلز کی تقرری کا اعلان کیا۔
ہندوستان کی جی ایس لکشمی، جو حال ہی میں آئی سی سی انٹرنیشنل پینل آف میچ ریفریز کی پہلی خاتون رکن بنی ہیں، کو فائنل کے لیے میچ ریفری مقرر کیا گیا ہے۔ قابل ذکر ہے کہ لکشمی نے اس گراؤنڈ پر 31 مارچ کو انگلینڈ اور جنوبی افریقہ کے درمیان سیمی فائنل میچ میں بھی میچ ریفری کا کردار ادا کیا تھا۔
جنوبی افریقہ کی لارین ایجین بیگ اور نیوزی لینڈ کی کم کاٹن کو آن فیلڈ امپائرز کے طور پر نامزد کیا گیا ہے۔ میلبورن کرکٹ گراؤنڈ (ایم سی جی) پرآسٹریلیا اور ہندوستان کے درمیان کھیلے گئے آئی سی سی خواتین کے ٹی20 ورلڈ کپ 2020 کے فائنل میں کاٹن واحد خاتون میچ آفیشل تھیں۔
اس کے علاوہ ویسٹ انڈیز کی جیکلین ولیمز، جو 2020 میں مردوں کے انٹرنیشنل میچ میں تھرڈ امپائر کے طور پر کام کرنے والی پہلی خاتون بنی تھیں، ٹی وی امپائر کی ذمہ داریاں سنبھالیں گی، جب کہ زمبابوے کی لینگٹن روسیرے فورتھ امپائر ہوں گی۔