کرائسٹ چرچ//
آئی سی سی خواتین عالمی رینکنگ کی نمبرایک آسٹریلیا اور نمبر 3 انگلینڈ کی ٹیمیں آئی سی سی خواتین ورلڈ کپ کے فائنل میں پانچویں بار ایک دوسرے سے ٹکرائیں گی۔
کرائسٹ چرچ کے ہیگلے اوول گراؤنڈ میں تین اپریل کو 2022 آئی سی سی ویمنز ورلڈ کپ کا فائنل کھیلا جائے گا۔ دونوں ہی ٹیمیں بڑی جیت کے ساتھ بھرپور اعتماد کے ساتھ فائنل میں پہنچی ہیں۔ منگل کو پہلے سیمی فائنل میں جہاں آسٹریلیا نے ویسٹ انڈیز کو 157 رنوں سے یکطرفہ انداز میں ہرایاتھا، تو وہیں دفاعی چیمپئن انگلینڈ نے آج دوسرے سیمی فائنل میں جنوبی افریقہ کو 137 رنوں سے شکست دی۔
قابل ذکر ہے کہ آسٹریلیا اور انگلینڈ اس سے قبل چار مرتبہ (1973، 1978، 1982، 1988) ویمنز ورلڈ کپ کے فائنل میں آمنے سامنے ہو چکے ہیں، جس میں آسٹریلیا نے انگلینڈ کو تین بار شکست دے کر ٹائٹل اپنے نام کیا ہے، جب کہ انگلینڈ ایک بارہی آسٹریلیا کو ہراپایا ہے۔ آسٹریلیا کاپلڑا ہمیشہ ہی بھاری رہا ہے۔ وہیں موجودہ ایڈیشن کی بات کریں تو اس میں بھی آسٹریلیا انگلینڈ سے مضبوط ٹیم ثابت ہوئی ہے۔ آسٹریلیا نے سیمی فائنل سمیت اپنے تمام سات لیگ میچ جیتے جبکہ انگلینڈ نے اپنے سات لیگ میچوں میں سے چار جیتے اور تین میں شکست کھائی۔
حالیہ دنوں کی بات کریں تو انگلینڈ کی خواتین ٹیم بھی عالمی کرکٹ نے اپنادبدبہ قائم کیاہے۔ انگلینڈ نے ویمنز ورلڈ کپ کے پچھلے 2017 ایڈیشن کاخطاب جیتا تھا، جس میں آسٹریلیاسیمی فائنل میں ہندوستان سے ہارکر باہرہوگیا تھا، جب کہ انگلینڈنے اس وقت بھی جنوبی افریقہ کو شکست دے کر فائنل میں جگہ بنائی تھی۔
قابل ذکر ہے کہ آسٹریلیا کے پاس ساتواں خواتین عالمی کپ ٹائٹل جیتنے کا موقع ہے تو وہیں انگلینڈ پانچویں بار خطاب جیتنے کے قریب ہے۔