بی جے پی نے کیجریوال کو قتل کرنے کی سازش کی: سسودیا

نئی دہلی// دہلی کے نائب وزیر اعلی منیش سسودیا نے کہا کہ بھارتیہ جنتا پارٹی (بی جے پی) گجرات اور دہلی کارپوریشن انتخابات میں اپنی شکست سے اتنی خوفزدہ ہے کہ اس نے اب وزیر اعلی اروند کیجریوال کو قتل کرنے کی سازش شروع کر دی ہے ۔
عام آدمی پارٹی (اے اے پی) کے سینئر لیڈر مسٹر سسودیا نے جمعہ کو ایک پریس کانفرنس میں کہا کہ گجرات اور کارپوریشن کھونے کے خوف سے تنگ آکر بی جے پی اب پارٹی کے قومی کنوینر مسٹر کیجریوال کو مارنے کی سازش کر رہی ہے ۔
انہوں نے کہا کہ بی جے پی ایم پی منوج تیواری کھلے عام اروند کیجریوال کو جان سے مارنے کی دھمکیاں دے رہے ہیں۔ مسٹر کیجریوال کو بدنام کرنے کی بی جے پی کی تمام سازشیں ناکام ہونے کے بعد اب وہ انہیں قتل کرنے کا منصوبہ بنا رہے ہیں۔
انہوں نے کہا کہ دہلی کے وزیر اعلیٰ کو کھلے عام جان سے مارنے کی دھمکی دینے والے بی جے پی کے رکن پارلیمنٹ منوج تیواری کے خلاف سخت کارروائی کی جانی چاہئے ، انہیں گرفتار کرکے یہ پوچھنا چاہئے کہ انہیں اس سازش کے بارے میں کیا معلوم تھا۔
انہوں نے کہا کہ دہلی میونسپل کارپوریشن اور گجرات اسمبلی انتخابات میں عام آدمی پارٹی کو زبردست عوامی حمایت مل رہی ہے ۔ اس کی وجہ سے بی جے پی کی شکست یقینی ہے ۔ ایسے میں شکست کا خوف بی جے پی پر اس حد تک حاوی ہو گیا ہے کہ وہ بوکھلا گئی ہے ۔ اس الیکشن سے پہلے بی جے پی والوں نے مسٹر کیجریوال کو بدنام کرنے کی بہت سازشیں کیں۔
انہوں نے کہا کہ مسٹر کیجریوال پر حملہ ہوسکتا ہے ۔ بڑا سوال یہ ہے کہ مسٹر تیواری کو کیسے پتہ چلا کہ وزیر اعلیٰ کیجریوال پر حملہ ہو سکتا ہے ؟ انہوں نے کہا کہ اس کی مکمل تحقیقات ہونی چاہئیں۔ اس معاملے کی شکایت الیکشن کمیشن سے کریں گے ۔ ان کے خلاف ایف آئی آر درج کریں گے اور مسٹر کیجریوال کو جان سے مارنے کی دھمکی دینے والے بی جے پی ایم پی تیواری کو گرفتار کرنے کا مطالبہ کریں گے ۔