جموں کشمیر کے صحت کے بنیادی ڈھانچے میں بہتری آئی ہے:چگ

سرینگر//
بی جے پی کے قومی جنرل سکریٹری ترون چْگ نے جموں و کشمیر کے سرکاری اسپتالوں میں ۲۶۵ پوسٹ گریجویٹ ڈی این بی نشستوں کی اجازت دینے کے وزیر اعظم نریندر مودی کے فیصلے کا خیر مقدم کیا ہے۔
چگ نے جنگجوئیت سے متاثرہ خاندانوں کے بچوں کے لیے میڈیکل کالجوں میں سیٹیں ریزرو کرنے کے وزیر اعظم کے فیصلے کا بھی خیر مقدم کیا۔
بی جے پی کے جنرل سیکریٹری نے کہا کہ اس سے بدقسمت خاندانوں کے بچوں کو ریلیف فراہم کرنے میں بہت مدد ملے گی۔انہوں نے کہا کہ عبداللہ اور مفتیوں کی ماضی کی حکومتوں کے برعکس مودی حکومت جموں و کشمیر کے لوگوں کی صحت کے مسائل کا مستقل طور پر خیال رکھتی ہے۔
چگ نے کہا کہ جب سے مودی حکومت نے مرکز کے زیر انتظام علاقے کا انتظام سنبھالا ہے جموں اور کشمیر کے علاقوں کے لیے دو ایمس مختص کیے گئے ہیں جبکہ دونوں خطوں میں کینسر کے دو ادارے بھی قائم کیے گئے ہیں۔
بی جے پی لیڈر کاکہنا تھا’’جہاں جموں خطے کو چار نئے میڈیکل کالج ملے ہیں، دو کشمیر کے علاقے میں کھولے گئے ہیں جو جموں و کشمیر کے بچوں کو طبی تعلیم فراہم کرنے میں ایک بڑی چھلانگ ثابت ہوں گے‘‘۔
چگ نے کہا کہ وزیر اعظم کی صحت کی مختلف اسکیمیں بھی جموں و کشمیر میں دور دراز کے لوگوں کو خدمات فراہم کر رہی ہیں جو کہ لوگوں کیلئے فائدے مند ثابت ہو رہی ہیں۔