علیحدگی پسندوں کو مین اسٹریم میں شامل ہونے کے سوا کوئی اوپشن ہی نہیں ہے :سنیل شرما

سرینگر/۲۶اکتوبر
بھارتیہ جنتا پارٹی(بی جے پی) کے سینئر لیڈر اور سابق وزیر‘ سنیل شرما کا کہنا ہے کہ تمام حریت لیڈر اور علیحدگی پسند قومی دھارے میں شامل ہوں گے کیونکہ وہ جانتے ہیں کہ ان کے لئے سارے دروازے بند ہوئے ہیں اور ان کی جگہ صرف جیل میں ہے ۔
شرما نے دعویٰ کیا کہ پاکستان کی ایما پر جو یہ لوگ دکان چلا رہے تھے وہ بند ہوچکے ہیں اور ان کا اب کوئی گاہک نہیں رہا ہے ۔
بی جے پی لیڈر نے ان باتوں کا اظہار بدھ کو یہاں یوم الحاق کے موقعے پر منعقدہ ایک تقریب کے حاشیہ پر نامہ نگاروں کے سوالوں کے جواب دینے کے دوران کیا۔
بلال غنی لون کی طرف سے قومی دھارے میں شامل ہونے کی خبروں کے بارے میں پوچھے جانے پر انہوں نے کہا”حریت لیڈروں اور علیحدگی پسندوں کےلئے اب صرف دو ہی اوپشنز ہیں یا تو وہ قومی دھارے میں شامل ہو جائیں یا جیل جائیں“۔
شرما کا کہنا تھا”ان تمام لوگوں بشمول حریت لیڈروں اور علیحدگی پسندوں کےلئے ایک ہی آپشن بچا ہے کہ وہ قومی دھارے میں شامل ہوجائیں ان کے تمام دروازے بند ہوگئے ہیں اب انہیں یا تو قومی دھارے میں شامل ہونا ہے یا جیل جانا ہے “۔
بی جے پی لیڈر نے کہا کہ پاکستان کی ایما پر چلنے والے حریت لیڈروں کی دکان بند ہوئی ہے اور اب ان کا کوئی گاہک نہیں رہا ہے ۔انہوں نے کہا”اب ان کےلئے یہ اوپشن ہے کہ وہ اب انہیں انڈیا کے دکان کھولنے ہیں کیونکہ اب یہی دکان جموں وکشمیر میں چلنے والے ہیں“۔
ان کا کہنا تھا کہ حریت لیڈروں کو اپنی روش درست کرنی چاہئے یا جیل جانے کےلئے تیار رہنا چاہئے ۔
الحاق کے حوالے سے حرےت لیڈر نے کہا کہ یوم الحاق کو جموں کشمیر میں تاریخی حیثیت حاصل ہے اس کو ان لوگوں کی یاد میں منایا جا تا ہے جنہوں نے اس دن اپنی جانوں کی قربانیاں پیش کیں۔