زوجیلا ٹنل مقررہ وقت سے پہلے ہی مکمل ہونے کا امکان

سرینگر/۲۸ مارچ(ندائے مشرق ویب ڈیسک)
لداخ کے سفر کے وقت کو کم کرنے کیلئے کشمیر میں اسٹریٹجک زوجیلا سرنگ کومقررہ وقت سے پہلے ہی مکمل کرنے کیلئے شد و مد سے کام جاری ہے ۔
یہ ہندوستان کے ان چند ترقیاتی منصوبوں میں سے ایک ہو سکتا ہے جو نومبر۲۰۲۶ کیلئے مقرر کی گئی آخری تاریخ سے پہلے مکمل ہو جائیگا۔
حکام کا کہنا ہے کہ کسی بھی ہنگامی صورت حال کی صورت میں اس سرنگ کو ستمبر۲۰۲۴ میں مسلح افواج کی نقل و حرکت کے لیے کھولا جاسکتاہے۔
میگھا انجینئرنگ اینڈ انفراسٹرکچرز لمیٹڈ (ایم ای آئی ایل) کے پروجیکٹ مینیجر ہرپال سنگھ کاکہنا ہے’’اگر چین کی وج( پی ایل اے) نے سرحد پر کوئی خلل ڈالا تو ستمبر۲۰۲۴ میں دفاعی مقاصد کیلئے کچی سرنگ بھارتی فوج کے ہنگامی استعمال کیلئے دستیاب ہو جائے گی‘‘۔
زوجیلا ٹنل کی ضرورت سب سے پہلے ۱۹۹۹ کی کرگل جنگ کے دوران محسوس کی گئی تھی اور چین کی حالیہ دراندازی نے اب اسے فوری ضرورت بنا دیا ہے۔
سنگھ نے کہا کہ یہ سرنگ ہندوستانی فوج کو لاجسٹک لچک اور آپریشنل نقل و حرکت فراہم کرے گی کیونکہ یہ زوجیلا پاس پر سفر کا وقت ساڈھے تین گھنٹے سے کم کر کے ۱۵ منٹ کر دے گی۔
سخت ترین سردیوں کے دوران جب درجہ حرارت منفی ۳۰ڈگری سینٹی گریڈ تک گر گیا، سنگھ نے کہا کہ ان کی کمپنی کے تقریباً ایک ہزار ملازمین کام کو مکمل کرنے کے لیے دور دراز پہاڑوں میں کام کر رہے ہیں۔
سنگھ نے کہا’’یہاں تک کہ ریچھ بھی چار مہینوں تک ہائبرنیشن (غیر فعالیت)میں چلے جائیں گے لیکن ہمارے آدمیوں نے سخت سردی میں کام جاری رکھا‘‘۔
ان کاساتھ ہی کہنا ہے’’ہم کام کو مزید تیز کرنے کیلئے اپنی افرادی قوت میں اضافہ کر رہے ہیں۔ دو مخالفوں، چین اور پاکستان کے ساتھ ہندوستان کی طویل سرحد کے ساتھ، یہ سرنگ فوج کو سرحدوں پر تصادم کے پیش نظر مادر وطن کا بہتر دفاع کرنے میں مدد دے گی‘‘۔
زوجیلا ٹنل‘جو وادی کشمیر کے مخروطی پوش پہاڑوں کے اختتام کی نشاندہی کرتی ہے‘ کشمیر کے سونمرگ کو سرد صحرائی لداخ میں مینا مرگ سے جوڑے گی۔
۲۶۰۰ کروڑ روپے کی لاگت سے تعمیر ہونے والی، گھوڑے کی نالی کی شکل والی زوجیلا سرنگ ہندوستان کی سب سے لمبی اور۳۴۸۵ میٹر کی بلند ترین سرنگ ہوگی۔
سنگھ کاکہنا ہے’’یہ انجینئرنگ شاہکار ہے۔ اس میں بڑی مہارت شامل ہے، سرنگ بالتال سے مینا مرگ کے درمیان فاصلے کو۴۰ کلومیٹر سے کم کر کے۱۳ کلومیٹر کر دے گی‘‘۔
ہمالیہ کی ارضیاتی ساخت میں تبدیلی کے ساتھ، سنگھ کا کہنا ہے کہ ان کی کمپنی عام طور پر استعمال ہونے والی ٹنل بورنگ مشینوں کے بجائے زوجیلا ٹنل کیلئے ڈرلنگ اور بلاسٹنگ کے طریقے استعمال کر رہی ہے۔
زوجیلا پروجیکٹ ۱۸کلومیٹر سرنگوں اور۱۷ کلومیٹر سڑکوں، تین عمودی شافٹوں اور چار پلوں پر مشتمل ہے۔’’کام جنگی بنیادوں پر جاری ہے اور اب تک۴۵ فیصد سڑکیں اور سرنگیں مکمل ہو چکی ہیں۔ ہم زوجیلا مین ٹنل کے دونوں سروں پر کام کر رہے ہیں اور۲ء۲ کلومیٹر مکمل کر چکے ہیں۔‘‘
فی الحال، زوجیلا پاس جو کشمیر کے دارالحکومت سرینگر کو لداخ سے جوڑتا ہے، صرف چھ ماہ کے لیے ہی چلنے کے قابل ہے کیونکہ برف کے جمع ہونے کی وجہ سے سردیوں میں اس تک رسائی ممکن نہیں ہے۔
یہ لداخ کے شہریوں کیلئے مشکلات پیدا کرتا ہے جنہیں موسم سرما کے شروع ہونے سے پہلے راشن کا ذخیرہ کرنا پڑتا ہے۔