جموں میں بیوی کے قتل میں شوہر کو گرفتار کیا گیا

جموں//
جموں کے رام نگر علاقے میں۱۶؍اکتوبر کے روز شادی شدہ خاتون کی لاش کو سسرال میں لٹکتے ہوئے پایا گیا جس کے بعد پولیس نے تحقیقات شروع کی۔
دوران پوچھ گچھ پولیس کو معلوم ہوا ہے کہ شوہر نے ہی اپنے بیوی کا قتل کرکے اُس کو خودکشی سے جوڑنے کی کوشش کی۔ پولیس نے ملزم کی گرفتاری عمل میں لا کر اُس کو سلاخوں کے پیچھے دھکیل دیا۔
اطلاعات کے مطابق جموں کے نالہ گوران تحصیل رام نگر میں ۱۶؍اکتوبر کے روز۳۱سالہ شالہ دیوی زوجہ پرما کی لاش کو کمرے میں لٹکتے ہوئے پایا گیا۔
پولیس نے لاش کو تحویل میں لے کر قانونی اور طبی لوازمات پورے کرنے کے بعد میت وارثین کے حوالے کی۔
ایس ڈی پی او رام نگر ڈاکٹر بشم دوبے کی سربراہی میں ایک خصوصی تحقیقاتی ٹیم تشکیل دی ۔ ابتدائی تفتیش کے دوران ٹیم کو پتہ چلا کہ یہ خود کشی نہیں بلکہ قتل کا معاملہ ہے ۔
پولیس نے مشتبہ افراد کو پوچھ تاچھ کے سلسلے میں گرفتار کیا جس دوران معلوم ہوا ہے کہ شالہ دیوی کا قتل اُس کے شوہر پرما نے ہی کیا ہے ۔
پولیس کی خصوصی ٹیم نے بتایا کہ شوہر نے پو چھ تاچھ کے دوران بتایا کہ اُس نے اپنی بیوی کی لاش کو اس لئے کمرے میں لٹکایا تاکہ یہ باور ہو سکے کہ یہ خود کشی کا معاملہ ہے ۔
پولیس نے شوہر کے خلاف ایف آئی آر زیر نمبر ۱۳۷زیر دفعہ ۳۰۲آئی پی سی کے تحت کیس درج کرکے مزید تحقیقات شروع کی ۔