بانڈی پورہ میں لشکر طیبہ ملی ٹینٹ پسند گرفتار: پولیس

سرینگر//
پولیس نے جمعہ کو شمالی کشمیر کے ضلع بانڈی پورہ میں لشکر طیبہ کے ایک جنگجو کو گرفتار کرنے کا دعویٰ کیا ہے۔
تفصیلات کے مطابق شمالی کشمیربانڈی پورہ کے زالوان نرسری علاقے میں عسکریت پسندوں کی نقل و حرکت سے متعلق مخصوص اطلاع پر کارروائی کرتے ہوئے، بانڈی پورہ پولیس نے سی آر پی ایف کے ساتھ مل کر ایک مشترکہ تلاشی آپریشن شروع کیا۔
تلاشی کے دوران لشکر طیبہ کے ایک مقامی طور پر تربیت یافتہ جنگجو کو گرفتار کیا گیا۔گرفتار جنگجو نے اپنی شناخت شاہد حسین بٹ ولد غلام حسن ساکن پلان بانڈی پورہ کے طور کی ہے۔
ا س کے انکشاف پر۲دستی بم برآمد ہوئے جو اس نے وارڈ نمبر۴پلان بانڈی پورہ کے قریب دھان کے کھیتوں میں رکھے تھے۔
پولیس کاکہنا ہے کہ گرفتار جنگجو پی او کے میں لشکر طیبہ کے جنگجو سے رابطے میں تھا اور اسے بانڈی پورہ میں پولیس / سیکورٹی فورسز کو نشانہ بنانے کا ٹاسک دیا گیا تھا۔ اسے سرحد پار سے اس کے ہینڈلرز نے بانڈی پورہ میں نوجوانوں کو ممنوعہ دہشت گرد تنظیم ایل ای ٹی میں بھرتی کرنے کے لیے متحرک کرنے کا ٹاسک بھی دیا تھا۔
اس سلسلے میں ایف آئی آر نمبر۲۰۲۲/۱۶۸ پی ایس بانڈی پورہ میں درج کر کے مزید تفتیش شروع کر دی گئی ہے۔