سرینگر//
علیحدگی پسند رہنما مرحوم سید علی گیلانی کے داماد الطاف احمد شاہ کی جسد خاکی کو اہل خانہ کے حوالے کر دیا گیا ہے۔
تہاڑ جیل کے ڈائریکٹر جنرل سندیپ گوئل نے بتایا کہ پوست مارٹم کے بعد لاش کو لواحقین کے حوالے کر دیا ہے۔
ٹیرر فنڈنگ کے معاملے کے الزام میں قید الطاف احمد شاہ کا منگل کے روز دہلی کے ایمس ہسپتال میں انتقال ہو گیا۔
اس حوالے سے تفصیلات فراہم کرتے ہوئے شاہ کی بیٹی روا شاہ نے ٹویٹ کر کے بتایا کہ اْن کے والد کا انتقال ہو گیا ہے۔ اْن کا کہنا تھا ’’میرے والد کا ایمس میں انتقال ہو گیا، بطور قیدی‘‘۔ روا شاہ نے رات کے تین بجے اپنے والد کے انتقال کی خبر ٹویٹ کی۔
مرحوم کی بیٹی نے ایک خبر رسان ادارے کو بتایا کہ منگل کی رات انکے خاندان کو حکام نے الطاف شاہ کی موت کے بارے میں آگاہ کیا۔
واضح رہے کہ شاہ کو دہلی ہائی کورٹ نے کینسرکی تشخیص کے بعد مناسب علاج کیلئے دہلی کے ایمس اسپتال منتقل کرنے کا حکم دیا تھا۔
اس سے قبل محمد الطاف شاہ کی بیٹی نے بھارت کے وزیر اعظم نریندر مودی کو خط لکھ کر اپنے بیمار والد کیلئے فوری طبی امداد کی درخواست کی تھی۔
الطاف شاہ، سات دیگر حریت لیڈروں سمیت۲۰۱۷ میں مبینہ ٹیرر فنڈنگ کے ایک کیس میں گرفتار کئے گئے تھے۔
ایک نجی ٹی وی چینل نے اسٹنگ آپریشن کے بعد دعویٰ کیا تھا کہ حریت کانفرنس کے یہ رہنما کشمیر میں تشدد اور علیحدگی پسندی کو فروغ دینے کیلئے سرحد پار سے رقومات حاصل کررہے ہیں۔ اس کیس کی تحقیقات کے دوران ان لیڈروں کو حراست میں لیکر دلی کے تہاڑ جیل میں نظر بند کیا گیا۔