ڈوڈہ میں آزاد کی پارٹی کے کارکنان آپس میں لڑ پڑے

جموں//
جموں کشمیر کے ضلع ڈوڈہ میں منگل کو منعقدہ غلام نبی آزاد کی ڈیموکریٹک آزاد پارٹی (ڈی اے پی ) کی ایک تقریب دوران کارکنان آپس میں ہی الجھ پڑے اور نوبت ایک دوسرے کے خلاف نعرے بازی پر بھی آ پہنچی۔
ڈی اے پی کے لیڈران نے بتایا کہ بھاجپا کے چند کارکنان اس تقریب میں گھس آئے جس وجہ سے ہنگامہ برپا ہوا۔
ذرائع نے بتایا کہ کارکنان کی جانب سے ایک دوسرے کے خلاف نعرے لگانے کے بعد تقریب میں کھلبلی مچ گئی۔
اس موقع پر لیڈران اور کارکنان نے بتایا کہ دوسری پارٹیوں خاص کر بھاجپا کے چند کارکن اس تقریب میں آئے اور نعرے بازی شروع کی۔اُن لیڈروں نے کہا’’ ہم سب غلام نبی آزاد کے شانہ بشانہ کھڑے ہیں‘‘۔
دریں اثنا عوامی حلقوں کا کہنا ہے کہ ابھی پارٹی کے حلقہ صدور اور ضلعی صدور کو منتخب کرنے کا عمل ہی شروع ہو رہا تھا کہ کارکنان نہ صرف الجھ پڑے بلکہ ایک دوسرے پر الزامات بھی عائد کئے ۔
بتادیں کہ ڈیموکریٹک آزاد پارٹی کے چیرمین غلام نبی آزاد نے پارٹی لیڈران کو ضلعی اور حلقہ صدور کے انتخاب کی ذمہ داری سونپی ہیں اور اس حوالے سے جموں اور کشمیر صوبوں میں لیڈران کو اختیارات بھی تقویض کئے گئے ہیں۔