ڈوڈہ میں بدنام زمانہ منشیات فروش پی ایس اے کے تحت گرفتار:پولیس

جموں//
جموںکشمیر کے ضلع ڈوڈہ میں پولیس نے ایک بدنام زمانہ منشیات فروش کے خلاف پبلک سیفٹی ایکٹ (پی ایس اے ) کے تحت مقدمہ عائد درج کرکے اس کو گرفتار کیا ہے ۔
ایک پولیس ترجمان نے کہا کہ ضلع ڈوڈہ میں ملزم صدام حسین زرگر عرف صنم پونچھی ولد علی محمد زرگر ساکن چنوٹ بھدرواہ کے خلاف منشیات فروشی اور سائیکو ٹراپک مواد ایکٹ۱۹۸۸کی دفعات کے تحت مقدمہ درج کیا اور اس کو ضلع جیل بھدرواہ میں بند رکھا گیا ہے ۔
ترجمان نے کہا کہ مذکورہ منشیات فروش پر یہ مقدمہ منشیات اپنی تحویل میں رکھنے اور ٹرانسپورٹ کرنے کے کام میں مسلسل ملوث رہنے کے پاداش میں عائد کیا گیا۔
پولیس کا بیان میں کہنا تھا’’مذکورہ منشیات فروش این ڈی پی ایس ایکٹ کے متعلق کئی جرائم میں ملوث تھا اور اس کے خلاف پولیس اسٹیشن گاندھی نگر اور پولیس اسٹیشن بھدرواہ میں ایف آئی آر درج ہیں‘‘۔
ترجمان نے کہا کہ ان مقدمات کی مناسب کارروائی کی گئی اور ضلع مجسٹریٹ ڈوڈہ ویشی پال مہاجن کی منظوری کے بعد منشیات فروش کو پی ایس اے کے تحت بند کرکے ضلع جیل بھدرواہ منتقل کیا گیا۔
پولیس ترجمان نے کہا کہ وہ علاقے کے نوجوانوں کیلئے ایک بہت بڑا خطرہ تھا۔
ڈوڈہ پولیس اور انتظامیہ نے ضلع میں منشیات کی وبا کے قلع قمع کو یقینی بنانے کیلئے آپریشن سنجیوانی شروع کیا ہے ۔