بڈگام میں فوجی اہلکار نے خودکشی کی

بڈگام//
وسطی کشمیر کے بڈگام ضلع میں ایک فوجی اہلکار نے مبینہ طور خود کو گولی مار کر اپنی زندگی کا خاتمہ کر دیا۔
سرکاری ذرائع نے بتایا کہ ضلع بڈگام کے ناگام علاقے میں ۵۳ آر آر سے وابستہ ایک فوجی اہلکار نے اپنی سروس رائفل سے خود کو گولی مار کر خود کشی کی۔
خون میں لت پت فوجی اہلکار کو ۹۲بیس آرمی ہسپتال سرینگر منتقل کیا گیا جہاں ڈیوٹی پر تعینات ڈاکٹروں کے مطابق اسپتال پہنچانے سے قبل ہی انکی موت واقع ہو چکی تھی۔
خودکشی کرنے والے فوجی اہلکار کی شناخت بھوپندر سنگھ ولد سرجیت سنگھ ساکنہ مکشور پور، پنجاب کے طور پر ہوئی ہے۔ بھوپندر سنگھ بڈگام کے ناگم کیمپ میں تعینات تھے۔
قانونی و طبی لوازمات کے بعد انکی میت کو آخری رسومات کے لیے لواحقین کے سپرد کر دیا جائے گا۔
ایک پولیس آفیسر نے بتایا کہ معاملہ کی نسبت کیس درج کرکے قانونی کارروائی شروع کی گئی ہے۔
دریں اثناء فوجی اہلکار کی جانب سے اٹھائے گئے اس اقدام کی فوری طور پر وجہ معلوم نہ ہو سکی۔ فوجی، نیم فوجی اور پولیس اہلکاروں کی جانب سے خودکشی اور برادر کشی کے بڑھتے واقعات پر ماہرین نے تشویش کا اظہار کیا ہے۔