’ہند چین افواج پیر تک گوگرا ہاٹ اسپرنگ سے واپس نکل جائیگی‘

نئی دہلی//
مشرقی لداخ کے گوگرا ہاٹ اسپرنگ علاقے سے ہندوستانی اور چینی فوجیوں کے انخلاء کا عمل شروع ہو گیا ہے اور پیر تک مکمل ہو جائے گا۔
اس سلسلے میں دونوں ممالک کی طرف سے مشترکہ بیان جاری کرنے کے ایک دن بعد جمعہ کو وزارت خارجہ کے ترجمان ارندم باگچی نے ایک سوال کے جواب میں کہا کہ دونوں فریق خطے میں فوجی تعطل سے پہلے قدرتی شکل کو بحال کریں گے ۔
اس میں کہا گیا ہے ’’دونوں فریقوں نے مرحلہ وار اور مربوط اور تصدیق شدہ طریقے سے خطے میں تعیناتی روک دی ہے جس کے نتیجے میں دونوں کے فوجی اپنے اپنے علاقوں میں واپس لوٹ جائیں گے ۔ اس بات پر بھی اتفاق کیا گیا ہے کہ اس علاقے میں دونوں فریقوں کی طرف سے تعمیر کردہ تمام عارضی اور متعلقہ ڈھانچوں کو گرا دیا جائے گا اور ان کی باہمی تصدیق بھی کی جائے گی۔ تعطل سے پہلے کی قدرتی شکل دونوں طرف سے بحال ہو جائے گی‘‘۔
ترجمان نے کہا کہ طے پانے والے معاہدے کے مطابق دونوں ممالک اس بات کو یقینی بنائیں گے کہ خطے میں لائن آف ایکچوئل کنٹرول کا مکمل احترام کیا جائے اور جمود کو یکطرفہ طور پر تبدیل نہیں کیا جائے گا۔
باگچی نے کہا کہ گوگرا کے علاقے میں تعطل کے حل کے بعد دونوں فریقین نے لائن آف ایکچوئل کنٹرول پر امن برقرار رکھنے کے لیے باقی مسائل کے حل کیلئے بات چیت کو آگے بڑھانے پر بھی اتفاق کیا ہے ۔