ایل اور سی پر سکوت:کیرن علاقے میں سیاحتی سرگرمیاں شروع ہونے لگیں

کپوارہ//
جموں کشمیر کے ضلع کپوارہ سے تقریباً۳۲ کلومیٹر کی دوری پر دریائے کشن گنگا (نیلم) کے کنارے پر کیرن علاقہ آباد ہے۔
ہند و پاک کے مابین لائن آف کنٹرول کا یہ آخری علاقہ ہے جہاں دونوں ممالک کی فوجیں بالکل آمنے سامنے ہیں۔ دو برس قبل مقامی لوگ گولہ بارود کی آواز کے خوف سے اپنے گھروں میں سہم جاتے تھے۔ لیکن آج یہ سیاحوں کی آمد کے منتظر ہوتے ہیں۔
امن و امان قائم رہنے سے اس خوبصورت علاقے میں رواں برس سے مقامی و غیر مقامی سیاح آرہے ہیں جن کے لیے اس کے دلکش نظارے جاذب نظر بن گئے ہیں۔
کیرن کے جو لوگ گولہ باری سے گھروں سے باہر نہیں نکل رہے تھے آج وہ سیاحت کی شروعات سے کافی خوش ہیں۔
جنگ بندی کی وجہ سے فخر الدین وانی جیسے نوجوان نے کشن گنگا (نیلم) کے کنارے ٹینٹ لگائے ہیں اور سیاحوں کو کرایہ پر دیتے ہیں۔
سیاحوں کی آمد سے مقامی لوگوں نے گھروں کو ’ہوم اسٹے‘ کیلئے کھول دیا ہے جہاں سیاح رہ سکتے ہیں۔ اگر ہند و پاک کے درمیان جنگ بندی قائم رہتی ہے تو یقینا لائن آف کنٹرول پر واقع علاقے تفریحی مقامات بن سکتے ہیں جس سے دونوں حریف ممالک حقیقت میں ہمسایوں کی طرح رہ سکیں گے۔