۵ گھنٹوں تک بند رہنے کے بعد سرینگر جموں شاہراہ پر ٹریفک بحال

رام بن//
مسلسل پانچ گھنٹوں تک ٹریفک بند رہنے کے بعد پیر کی دوپہر کو سرینگر جموں شاہراہ پر ٹریفک بحال کر دیا گیاہے۔پیر کی صبح مٹی کے تودے گر آنے کے سبب شاہراہ کو ٹریفک کی نقل و حمل کیلئے بند کر دیا گیا تھا۔
حکام نے بتایا کہ وادی کشمیر کو ملک کے باقی حصوں کے ساتھ جوڑنے والی ۲۷۰کلو میٹر طویل سرینگر جموں شاہراہ ضلع رام بن کے مہاڑ علاقے میں چٹانیں کھسک آنے کی وجہ سے قریب ۵گھنٹوں تک بند رہنے کے بعد ٹریفک کی نقل و حمل کے لئے بحال کردی گئی ہے۔
ٹریفک حکام نے بتایا کہ رام بن کے مہیاڑ اور کیفٹریہ موڑ کے مقام پر چٹانیں کھسک آنے اور مٹی کے تودے گر آئے تھے جس کی وجہ سے ٹریفک کی نقل و حرکت مکمل طو رپر بند ہو گئی تھی۔ انہوں نے کہا کہ شاہراہ کے دونوں طرف چھوٹی بڑی، مسافر اور مال بردار گاڑیوں کی لمبی قطاریں لگ گئی تھی، وہیں انتظامیہ کی جانب سے شاہراہ کو بحال کرنے کے لیے مشینری اور عملہ کو کام پر لگا دیا گیا اور دوپہر قریب دو بجے شاہراہ کو ٹریفک کے لیے بحال کر دیا گیا۔
حکام نے عوام سے اپیل کی ہے کہ وہ سرینگر جموں اور رام بن میں قائم ٹریفک کنٹرول یونٹس کے ساتھ رابطہ کرنے سے قبل شاہراہ پر سفر کرنے سے اجتناب کریں۔