عدلیہ پر اعتماد کھونا جمہوریت کی بقا کیلئے خطرہ:چیف جسٹس

حیدرآباد//
سپریم کورٹ کے چیف جسٹس جسٹس این وی رمنا نے کہا ہے کہ عدلیہ پر اعتماد کھونا جمہوریت کی بقا کے لیے خطرہ ہے ۔انہوں نے اے پی کے وجئے واڑہ میں نوتعمیر شدہ کورٹ کامپلکس کا افتتاح انجام دیا۔
اس موقع پر منعقدہ تقریب سے تلگومیں خطاب کرتے ہوئے انہوں نے کہاکہ اس بات کو یقینی بنانے کی ضرورت ہے کہ عوام کا بھروسہ عدلیہ پر سے نہ اٹھے ۔انہوں نے خواہش ظاہر کی کہ ججز اور وکلاء زیر التوا مقدمات میں جلد انصاف فراہم کرنے کی کوشش کریں۔
یہ کہتے ہوئے کہ وکلاء کو معاشرہ میں تبدیلی کیلئے کام کرنا چاہئے ۔ انہوں نے سینئر وکلاء کو مشورہ دیا کہ جونیئرز کی حوصلہ افزائی کریں۔جسٹس رمنا نے کہا کہ معاشرہ پرامن اور متحد ہو گا تو ترقی بہت آسان ہو گی۔ انہوں نے کہا کہ بعض ریاستوں کو مالی مشکلات کا سامنا ہے ، اس تناظر میں عدالتوں کی عمارتوں کی تعمیر کیلئے مرکز سے فنڈز کی درخواست کی گئی ہے ۔ انہوں نے کہا کہ اگر مرکزی فنڈز دیئے جائیں تو بہتر ہوگا۔
جسٹس رمنا نے کہا کہ انہوں نے عدالتوں میں بہت سی اسامیاں پُر کی ہیں جس میں تمام ذاتوں اور علاقوں کے لوگوں کو نمائندگی دی گئی ہے ۔انہوں نے مسرت کااظہارکرتے ہوئے کہا کہ جس عمارت کا انہوں نے سنگ بنیاد رکھا تھا آج اس کا افتتاح کرنے پر انہیں فخر محسوس ہورہا ہے ۔ مختلف وجوہات کی بنا پر کورٹ کامپلکس کی تعمیر میں تاخیر ہوئی۔
چیف جسٹس آف انڈیا نے زور دیتے ہوئے کہا کہ متحدہ آندھراپردیش کی تقسیم کے بعد موجودہ اے پی ریاست معاشی طور پر پیچھے رہ گئی ہے ، اے پی کے عوام کو لگتا ہے کہ تقسیم کی وجہ سے وہ مسائل کا شکار ہوگئے ہیں، اس لیے مرکز کو اس سلسلے میں ریاست کو مدد فراہم کرنی چاہیے ۔
جسٹس رمنا نے کہا کہ انہوں نے دو تلگو ریاستوں میں ججوں کی آسامیوں کو پُر کیا ہے ۔ اسی طرح وہ ہائی کورٹ کے۲۵۰ججوں اور سپریم کورٹ کے۱۱ججوں کی تقرری کرنے میں کامیاب رہے ۔ انہوں نے کہاکہ وزیراعلی وائی ایس جگن کے تعاون کی وجہ سے ہی اس عدالت کی عمارت کو مکمل کرنے میں کامیاب ہوئے ہیں۔
وزیراعلی وائی ایس جگن موہن ریڈی نے کہا کہ اس سرزمین پر پیدا ہونے والے رمنا، ملک کی اعلی ترین عدالت کے چیف جسٹس کے عہدہ پر فائز ہوئے جن کے ہاتھوں عدالت کی عمارت کا افتتاح کیا عمل میں آیا، یہ ایک یادگار تقریب ہے ۔ انہوں نے کہا کہ آندھرا پردیش کی حکومت عدلیہ سے متعلق تمام معاملات میں تعاون کرے گی۔
واضح رہے کہ اس کورٹ کامپلکس کا سنگ بنیاد۲۰۱۳میں جسٹس این وی رمنا کے ہاتھوں رکھا گیا تھا، اور پھر ان کے ہاتھوں اس کا افتتاح عمل میں آیا۔
اس تقریب میں اے پی ہائی کورٹ کے چیف جسٹس پرشانت کمار مشرا اوردیگر ججس نے بھی شرکت کی۔اس نوتعمیر شدہ کامپلکس میں۶فلورس کا کام مکمل ہوگیا ہے ۔ نئے کورٹ کامپلکس میں۲۹عدالتیں کام کریں گی۔اس کامپلکس کی تعمیر پر۱۰۰کروڑ روپئے صرف کئے گئے ہیں۔ جسٹس این وی رمنا کا وجئے واڑہ کی عدالت سے کافی گہرا تعلق ہے کیونکہ انہوں نے یہاں سے اپنے قانون کے کیریئر کا آغاز کیا۔ چیف جسٹس رمنا اور وزیراعلی جگن نے کورٹ کامپلکس کے احاطے میں پودا لگایا۔
بعد ازاں جسٹس رمنا نے آچاریہ ناگرجنا یونیورسٹی میں گریجویشن تقریب میں مہمان خصوصی کے طورپر شرکت کی اور یونیورسٹی کی طرف سے دی گئی ڈاکٹریٹ کی ڈگری حاصل کی۔ گورنر وشو بھوشن ہری چندن، ر یاستی وزیر بوتسا ستیہ نارائنا، یونیورسٹی کے وائس چانسلر پروفیسر پتیٹی راج شیکھر اور دیگر اس پروگرام میں شریک تھے ۔