بنگلہ دیش ہمارا قیمتی ساتھی ہے : جے شنکر

بنگلورو// وزیر خارجہ ایس جے شنکر نے ہفتہ کو بنگلہ دیش کو ایک بہت ہی قیمتی شراکت دار قرار دیتے ہوئے کہا کہ ہندوستان اس کے ساتھ تعلقات کو فروغ دینے کے لئے پرعزم ہے ۔
مسٹر جے شنکر نے چین اور تائیوان کے درمیان کشیدگی کے تناظر میں بنگلہ دیش کے "ایک چین” کے موقف پر تبصرہ کرتے ہوئے یہ بات کہی۔
انہوں نے پی ای ایس یونیورسٹی میں طلباء کی طرف سے پوچھے گئے ایک سوال کا جواب دیتے ہوئے کہاکہ "بنگلہ دیش ایک خودمختار ملک ہے ۔ ان کے اپنے مفادات ہیں۔ ان کا اپنا نقطہ نظر ہے ۔ وہ (چیزیں) اپنے مفاد میں اور اپنے فیصلے کے مطابق کریں گے ۔
انہوں نے کہاکہ "بنگلہ دیش کے ساتھ ہمارے بہت خاص تعلقات ہیں۔ بنگلہ دیش ہمارے لیے ایک بہت ہی قیمتی شراکت دار ہے اور ہم واضح طور پر اس تعلقات کو فروغ دینے کے لیے بہت پرعزم ہیں۔”
مسٹر جے شنکر نے بنگلہ دیش کے ساتھ تعلقات کو بہتر بنانے کے لیے مودی حکومت کی ستائش کی۔ انہوں نے کہا کہ ہندوستان کو بنگلہ دیش کے ساتھ زمینی سرحدی معاہدے سے کنیکٹیویٹی کے معاملے میں بہت فائدہ ہوا ہے ۔
انہوں نے کہا کہ تعلقات ہمیشہ اتنے اچھے نہیں رہے جتنے آج ہیں۔ ہمیں ماضی میں بنگلہ دیش کے ساتھ مسائل کا سامنا رہا ہے ۔
انہوں نے کہاکہ’’ اگر ہم وزیر اعظم نریندر مودی کی آٹھ سالہ حکومت پر نظر ڈالیں اور اگر کوئی مجھ سے خارجہ پالیسی میں پہلی پانچ کامیابیوں یا یہاں تک کہ سب سے اوپر کی تین کامیابیوں کا انتخاب کرنے کو کہے تو ہم نے بنگلہ دیش کے ساتھ جو زمینی سمجھوتہ کیا تھا، اسے منتخب کروں گا۔’’
انہوں نے کہاکہ اس سے ہمیں سرحدی کشیدگی کو مستحکم کرنے اور رابطہ قائم کرنے کے معاملے میں بہت فائدہ ہوا ہے ۔ وزیر اعظم نریندر مودی کی کوششوں سے شمال مشرق میں دہشت گردی کا مسئلہ ختم ہو گیا ہے اور امن و امان بحال ہو گیا ہے ۔