میرے خلاف بول کر بی جے پی میں سشیل کچھ بن جاتے ہیں تو پھر بولتے رہیں: نتیش

پٹنہ// بہار کے وزیر اعلیٰ نتیش کمار نے آج کہا کہ اگر بھارتیہ جنتا پارٹی (بی جے پی) لیڈر سشیل کمار مودی ان کے خلاف بولنے سے پارٹی میں کچھ بن جاتے ہیں تو بولتے رہیں، اس سے انہیں کوئی فرق نہیں پڑتا۔
جمعرات کو یہاں نائب وزیر اعلی تیجسوی پرساد یادو کے ساتھ یوم شہداء کے موقع پر شہیدوں کو خراج عقیدت پیش کرنے کے بعد نامہ نگاروں سے بات چیت کرتے ہوئے مسٹر کمار نے بی جے پی کے راجیہ سبھا ممبر پارلیمنٹ سشیل کمار مودی کے کل کے بیان کے بعد اب کہا کہ کچھ لوگ میرے خلاف ہیں۔ جھوٹی بیان بازی کررہے ہیں۔ آپ نے دیکھا کہ وہ کیسے کہہ رہے تھے کہ میں نائب صدر بننا چاہتا تھا، نہیں بن سکا تو اتحاد توڑ دیا۔
وزیر اعلیٰ نے واضح کیا کہ مسٹر مودی نے جو بھی الزام لگایا ہے وہ پوری طرح سے جھوٹا اور بے بنیاد ہے ۔ مسٹر مودی پر طنز کرتے ہوئے انہوں نے کہا کہ مجھے اس سے کوئی فرق نہیں پڑتا کہ وہ میرے خلاف کیا بولنا چاہتے ہیں، فی الحال وہ کچھ بھی نہیں ہیں، میرے خلاف بولنے سے اگر انہیں پارٹی میں کوئی ذمہ داری مل جاتی ہے تو یہ ان کے لیے بہتر ہے ۔
ایک وقت تھا جب مسٹر کمار اور مسٹر مودی ہر جگہ ایک ساتھ نظر آتے تھے ۔ لیکن، بدلے ہوئے سیاسی منظر نامے کے بعد دونوں لیڈروں کے درمیان فاصلے اس قدر بڑھ گئے ہیں کہ وہ ایک دوسرے کے خلاف بیانات دینے سے بھی پرہیز نہیں کر رہے ہیں۔
بی جے پی کے راجیہ سبھا ممبر پارلیمنٹ سشیل کمار مودی نے کل بہار میں اقتدار کی تبدیلی پر مسٹر کمار پر کئی الزامات لگائے تھے ۔ انہوں نے کہا تھا کہ مسٹر کمار نائب صدر بننا چاہتے تھے ، انہوں نے اس کے لیے کوشش کی تھی لیکن بی جے پی نے ان کی بات نہیں سنی۔ اسی طرح جنتا دل یونائیٹڈ (جے ڈی یو) کے سابق قومی صدر آر سی پی سنگھ سے مسٹر کمار سے مرکز میں وزیر بنائے جانے کی رضامندی لینے کی بات کہی گئی تھی۔ انہوں نے مسٹر کمار کو موقع پرست لیڈر قرار دیا تھا۔
اس موقع پر نائب وزیر اعلیٰ تیجسوی پرساد یادو نے کہا کہ مہاگٹھ بندھن کے لوگ عوام کے لیے فکر مند ہیں۔ ہم عوامی مفاد کے لیے کام کرتے ہیں۔ اس کے ساتھ ساتھ بی جے پی ہے جو جوڑ توڑ کی سیاست میں مصروف رہتی ہے ۔ انہوں نے کہا کہ بی جے پی کا ایک ہی اصول ہے کہ جو خوفزدہ نہیں ہوگا اسے محکمہ انکم ٹیکس اور انفورسمنٹ ڈائریکٹوریٹ (ای ڈی) سے خوفزدہ کرو۔ جیسا کہ ملک میں کئی مقامات پر دیکھا گیا ہے ۔
نائب وزیر اعلیٰ نے کہا کہ جو کچھ بھی بکتا ہے اسے خرید لو اور بی جے پی میں شامل کرلو۔ بی جے پی اسی حکمت عملی پر ملک میں سیاست کر رہی ہے ۔ انہوں نے کہا کہ مہا گٹھ بندھن ہمیشہ عوام کے چہروں پر خوشیاں لانے کے لیے کام کرتا ہے ۔