دھم پور؍۱۱ نومبر
وزیرِ اعلیٰ عمر عبداللہ نے آج ادھم پور میں ایک جامع جائزہ اجلاس کی صدارت کرتے ہوئے ضلع میں ترقیاتی سرگرمیوں، جاری منصوبوں کی پیش رفت اور عوام کو فراہم کی جانے والی بنیادی خدمات کا جائزہ لیا۔
عمرعبداللہ نے افسران کو ہدایت دی کہ ترقیاتی منصوبوں پر عمل درآمد میں تیزی لائی جائے اور سرکاری اسکیموں کے فوائد عوام تک بروقت پہنچائے جائیں۔
اپنے دورے کے دوران وزیرِ اعلیٰ نے محکمہ دیہی ترقی (آر ڈی ڈی) کے چار ترقیاتی منصوبوں کا ای افتتاح بھی کیا، جن کی تعمیر پر مجموعی طور پر۵ء۰۶ کروڑ روپے خرچ کیے گئے ہیں۔ ان منصوبوں سے ضلع میں بنیادی سطح پر ترقیاتی ڈھانچے کو مزید مضبوطی ملے گی۔
افتتاح کیے گئے منصوبوں میں ادھم پور میں ضلع ترقیاتی کونسل (ڈی ڈی سی) کی عمارت شامل ہے، جس کی تعمیر پر۲۳۵ء۷۶ لاکھ روپے خرچ ہوئے ہیں۔ اس کے علاوہ پرلی دھار میں بلاک ڈیولپمنٹ کونسل (بی ڈی سی) کی عمارت پر۸۰ء۱۷ لاکھ روپے، جگانو میں بی ڈی سی عمارت پر۸۴ء۴۱ لاکھ روپے اور سیونا میں بی ڈی سی عمارت کی تعمیر پر۱۰۶ء۳۲ لاکھ روپے خرچ کیے گئے ہیں۔
یہ منصوبے کیپیکس بجٹ کے تحت مکمل کیے گئے ہیں اور ادھم پور ایسٹ، رام نگر اور چنینی اسمبلی حلقوں سے متعلق ہیں۔
جائزہ اجلاس کے دوران وزیرِ اعلیٰ نے تمام محکموں کو جاری ترقیاتی کاموں میں تیزی لانے کی ہدایت دی اور خاص طور پر زمینی سطح پر کاموں کی پیش رفت بہتر بنانے اور مختص فنڈز کا مؤثر استعمال یقینی بنانے پر زور دیا۔ انہوں نے کہا کہ ترقیاتی منصوبوں پر مربوط انداز میں مقررہ مدت کے اندر عمل ہونا چاہیے اور ہر سطح پر جوابدہی یقینی بنائی جانی چاہیے۔
اسپیشل اسسٹنس ٹو اسٹیٹس فار کیپٹل انویسٹمنٹ (ایس اے ایس سی آئی) کے تحت جاری منصوبوں کی قریبی نگرانی پر زور دیتے ہوئے عمر عبداللہ نے ہدایت دی کہ ان منصوبوں کی پیش رفت کا ہر پندرہ روز بعد جائزہ لیا جائے تاکہ رکاوٹوں کی نشاندہی کرکے انہیں دور کیا جاسکے اور کاموں کی بروقت تکمیل یقینی بنائی جاسکے۔ انہوں نے مختص فنڈز کے زیادہ سے زیادہ استعمال اور ضلع کو دستیاب مالی معاونت کا مکمل فائدہ پہنچانے کی ضرورت پر بھی زور دیا۔
وزیرِ اعلیٰ نے مختلف ترقیاتی اور امدادی اسکیموں کے تحت فنڈز بروقت جاری کرنے کی اہمیت اجاگر کرتے ہوئے بالخصوص حلقہ ترقیاتی فنڈ (سی ڈی ایف) کا ذکر کیا۔ انہوں نے کہا کہ فنڈز کی اجرائی میں تاخیر سے نہ تو عوامی کام متاثر ہونے چاہئیں اور نہ ہی مستحق افراد بروقت امداد سے محروم رہنے چاہئیں۔
منصوبوں پر عمل درآمد سے متعلق امور کا جائزہ لیتے ہوئے عمر عبداللہ نے ضلعی انتظامیہ کو ہدایت دی کہ مقررہ قواعد و ضوابط کے مطابق زیر التوا جنگلاتی منظوریوں کے عمل میں تیزی لائی جائے اور غیر ضروری تاخیر سے بچنے کے لیے متعلقہ محکموں کے درمیان قریبی تال میل برقرار رکھا جائے۔
اس سے قبل ڈپٹی کمشنر ادھم پور اننتھ دویدی نے ضلع کی مجموعی ترقیاتی صورت حال، مختلف شعبوں کی کامیابیوں، جاری منصوبوں، مالی اور زمینی پیش رفت اور موسمِ سرما کی تیاریوں کے حوالے سے تفصیلی بریفنگ دی۔
اہم بنیادی ڈھانچے کے منصوبوں کا جائزہ لیتے ہوئے اجلاس کو بتایا گیا کہ بائلی میں گورنمنٹ میڈیکل کالج ادھم پور کے تعمیراتی کام میں مجموعی طور پر۸۸ فیصد پیش رفت حاصل کی گئی ہے۔ اس کے علاوہ قومی شاہراہوں این ایچ۲۴۴ ‘این ایچ۴۴؍اور این ایچ اے ون سے متعلق منصوبوں کی پیش رفت سے بھی آگاہ کیا گیا۔ سوادیش درشن اسکیم کے تحت منٹلائی سیاحتی ترقیاتی منصوبے کا بھی جائزہ لیا گیا، جس کے لیے درخواستِ تجویز (آر ایف پی) جمع کرانے کی آخری تاریخ نومبر۲۰۲۶ مقرر ہے۔
اجلاس میں موسمِ سرما کی تیاریوں پر بھی تفصیلی تبادلہ خیال ہوا۔ ڈپٹی کمشنر نے بتایا کہ تقریباً۷۷۵ کلومیٹر طویل۱۲۴ سڑکوں سے برف ہٹانے کے لیے جامع نظام تیار کیا گیا ہے اور اس مقصد کے لیے ضروری مشینری تعینات کی گئی ہے۔ اس کے علاوہ بجلی کے کھمبوں اور ٹرانسفارمروں کا اضافی ذخیرہ، پانی کے ٹینکروں اور طبی ساز و سامان کی دستیابی اور برفباری سے متاثر ہونے والے علاقوں میں راشن کا پیشگی ذخیرہ یقینی بنایا گیا ہے تاکہ موسمِ سرما کے دوران ضروری خدمات بلا تعطل جاری رہیں۔
اجلاس میں ضلعی اور یو ٹی کیپیکس بجٹ کے تحت پیش رفت، قبائلی امور سے متعلق اقدامات، پی ایم جی ایس وائی کے تحت سڑک رابطوں، منریگا کے تحت روزگار کی فراہمی اور پی ایم اے وائی-جی کے تحت مکانات کی تعمیر و تکمیل کا بھی جائزہ لیا گیا۔
پانی اور بجلی کے شعبوں میں جل جیون مشن، امرت۲ء۰ کے تحت شہری علاقوں میں پانی کی فراہمی کے منصوبوں، اسمارٹ میٹرنگ اور ریویمپڈ ڈسٹری بیوشن سیکٹر اسکیم (آر ڈی ایس ایس) کے تحت بنیادی ڈھانچے کو مضبوط بنانے سے متعلق امور زیر بحث آئے۔ وزیرِ اعلیٰ نے بالخصوص سردیوں کے دوران عوام کو قابل اعتماد بنیادی سہولیات فراہم کرنے کی اہمیت پر زور دیا۔
صحت اور سماجی بہبود کے شعبوں کا بھی جائزہ لیا گیا، جس میں پی ایم جے اے وائی-سہت کے تحت مستفیدین کی کوریج، تپ دق کے خاتمے کی کوششوں، ادارہ جاتی زچگی، سماجی تحفظ پنشن کی فراہمی اور مشن شکتی کے تحت اقدامات شامل تھے۔
زراعت اور اس سے منسلک شعبوں کے حوالے سے ڈپٹی کمشنر نے ہولیسٹک ایگریکلچر ڈیولپمنٹ پروگرام (ایچ اے ڈی پی) پر عمل درآمد، کسان خدمت گھروں کی کارکردگی، کسان کریڈٹ کارڈز (کے سی سی) کے اجرا اور ایگری اسٹیک کسان شناختی کارڈز کی تیاری میں ہونے والی پیش رفت سے آگاہ کیا۔ انہوں نے بتایا کہ اس سلسلے میں ادھم پور مرکز کے زیر انتظام علاقے کے نمایاں اضلاع میں شامل ہوگیا ہے۔
اجلاس میں صنعتی ترقی، بٹل بالیاں میں انڈسٹریل انفراسٹرکچر ڈیولپمنٹ سینٹر، سوامِتو اسکیم کے تحت پراپرٹی کارڈز کی تقسیم، کان کنی کی سرگرمیوں کے ضابطے، محصولات کی وصولی اور محکمہ خوراک، شہری رسد اور امورِ صارفین کے ذریعے مستحقین تک راشن کی تقسیم کا بھی جائزہ لیا گیا۔
عوامی شکایات کے ازالے کے حوالے سے اجلاس کو بتایا گیا کہ ضلع میں جے کے سمادھان پورٹل کے ذریعے موصول ہونے والی۹۶ فیصد شکایات کا ازالہ کیا جا چکا ہے۔ وزیرِ اعلیٰ نے جوابدہ انتظامیہ اور عوامی شکایات کا بروقت حل یقینی بنانے کی اہمیت پر زور دیا۔
وزیرِ اعلیٰ کے دورے کے دوران مختلف وفود نے بھی ان سے ملاقات کی اور اپنے اپنے علاقوں اور شعبوں سے متعلق عوامی مسائل اور مطالبات سے انہیں آگاہ کیا۔
۔۔۔۔۔۔(ڈی آئی پی آر)
