نہیں صاحب، ایسا نہیں ہے اور بالکل بھی نہیں ہے کہ ہمیں کسی کی نیت پر شک ہے…. اپنے بادشاہوں، معاف کیجیے، کہنے کا مطلب ہے کہ اپنے حکمرانوں کی نیت پر تو بالکل بھی نہیں ہے…. لیکن…. لیکن صاحب، ایک بات جو ہماری سمجھ میں نہیں آ رہی ہے اور…. بالکل بھی نہیں آ رہی ہے کہ ہمارے حکمرانوں نے سمارٹ میٹر والے علاقوں میں بلاخلل بجلی کی فراہمی یقینی بنانے کی جو ہدایت دی ہے، یا ہدایت دے رکھی ہے، سالہا سال پہلے دے رکھی ہے، اس پر عمل کیسے ہوگا؟اگر آپ کی سمجھ میں کچھ آ رہا ہے تو…. تو برائے مہربانی ہمیں بھی سمجھائیے….اور اس لیے سمجھائیے کہ ابھی تک میٹر والے علاقے کیا اور بغیر میٹر والے کیا…. سمارٹ میٹر کیا اور غیر سمارٹ میٹر کیا…. ایک ہی صف میں کھڑے ہیں ہم سب…. میٹر والوں کو بلاخلل اور بلاکٹوتی کے بجلی مل رہی ہے اور نہ غیر میٹر والے علاقوں کو…. سمارٹ میٹر والے بھی اس کٹوتی سے مستثنیٰ نہیں ہیں اور…. اور بالکل بھی نہیں ہیں۔تو صاحب، سمارٹ میٹر والے علاقوں میں ہمارے حکمران جس بلاخلل اور بلا تعطل بجلی کی فراہمی کی بات کر رہے ہیں، وہ بجلی کہاں سے آئے گی؟ اس بجلی کو کہاں سے اور کون خریدے گا کہ…. کہ پہلے ہی ہم پر واضح کیا جا چکا ہے اور…. اور واضح ہدایات بھی دی جا چکی ہیں کہ…. کہ اضافی بجلی خریدی نہیں جائے گی…. پھر بجلی کہاں سے آئے گی؟کیا ان علاقوں کو مزید تاریکیوں میں ڈبو دیا جائے گا جہاں ابھی میٹر اور سمارٹ میٹر نہیں لگے ہیں؟ صاحب، اگر حکمرانوں کا کوئی ایسا ارادہ ہے تو…. تو یہ تو ان علاقوں سے ناانصافی ہے، زیادتی ہے اور…. اور ظلم بھی ہے کہ…. کہ اگر ان علاقوں میں میٹر یا سمارٹ میٹر نہیں لگا ہے تو…. تو اس میں بیچارے لوگوں کی کیا خطا ہے؟ ان کی تو کوئی خطا نہیں ہے کہ…. کہ یہ نااہلی حکومت کی ہے…. نکما پن انتظامیہ کا ہے…. لوگوں کی کوئی خطا نہیں ہے کہ….کہ پہلے ہی لوگوں کو….کشمیر کے لوگوں کو سزا مل رہی ہے…. بے ہنگم بجلی کٹوتی کی وجہ سے انہیں سزا مل رہی ہے…. انہیں تکلیف ہو رہی ہے، انہیں پریشانی ہو رہی ہے۔ہمیں یقین ہے کہ ایسا ویسا کچھ نہیں کیا جائے گا اور…. اور بغیر میٹر والے علاقوں کو مزید کوئی سزا نہیں دی جائے گی کہ…. کہ اگر انتظامیہ سچ میں سمارٹ میٹر والے علاقوں میں بغیر خلل بجلی فراہم کرنے میں سنجیدہ ہے اور…. اور سو فیصد ہے تو…. تو پھر اب تک اس بات کو یقینی کیوں نہیں بنایا گیا ہے؟کہ اللہ میاں کی قسم، ابھی تو سرما آیا بھی نہیں ہے، ابھی تو خزاں ہی چل رہی ہے اور خزاں میں ہی بجلی کی فراہمی پر بھی خزاں چھا گئی ہے اور سو فیصد چھا گئی ہے…. ہے نا؟
۔۔۔۔۔۔۔۔۔
