سرینگر؍یکم اکتوبر
جموں و کشمیر ٹرانسپورٹ محکمہ نے۲۵ سال کی مدت مکمل کرچکی تجارتی گاڑیوں کے خلاف کارروائی تیز کردی ہے اور ایسی گاڑیوں کے مالکان کو انہیں اسکریپ کرنے کی ہدایت دیتے ہوئے خبردار کیا ہے کہ اگر یہ گاڑیاں عوامی سڑکوں پر چلتی پائی گئیں تو سخت کارروائی کی جائے گی۔
ٹرانسپورٹ کمشنر جموں و کشمیر ویشیش پال مہاجن نے ان تجارتی گاڑیوں کے مالکان سے اپیل کی ہے جو مقررہ عمر کی حد تک پہنچ چکی ہیں کہ وہ متعلقہ ضوابط کے مطابق رضاکارانہ طور پر اپنی گاڑیوں کو اسکریپ کردیں۔
مہاجن نے ایکس پر ایک پوسٹ میں تجارتی گاڑیوں کے مالکان پر زور دیا کہ وہ فوری کارروائی کریں اور کہا کہ۲۵ سال کی عمر مکمل کرچکی گاڑیوں کو اسکریپ کردیا جانا چاہیے۔
انہوں نے مزید بتایا کہ متعلقہ فیلڈ دفاتر کو ایسی گاڑیوں کے خلاف نفاذی کارروائی کرنے کی ہدایات جاری کردی گئی ہیں۔ حکام سے کہا گیا ہے کہ زائد العمر تجارتی گاڑیاں ضبط کی جائیں اور اگر وہ سڑکوں پر چلتی ہوئی پائی جائیں تو ایف آئی آر درج کی جائے۔
ٹرانسپورٹ کمشنر نے کہا کہ اس اقدام کا مقصد مسافروں اور سڑک استعمال کرنے والے دیگر افراد کی حفاظت کو یقینی بنانا ہے۔ انہوں نے اس بات پر زور دیا کہ محکمہ ان گاڑیوں کے مسلسل چلنے کو لے کر فکرمند ہے جو مقررہ عمر کی حد عبور کرچکی ہیں۔
توقع ہے کہ فیلڈ سطح پر نفاذ کا طریقہ کار مزید سخت کیا جائے گا اور جموں و کشمیر بھر میں زائد العمر تجارتی گاڑیوں کی نشاندہی کرنے اور انہیں فعال آپریشن سے ہٹانے کے لیے جانچ پڑتال میں اضافہ کیا جائے گا۔
ٹرانسپورٹ محکمہ نے اس کے مطابق گاڑیوں کے مالکان سے مقررہ ضوابط کی پابندی کرنے اور۲۵سال مکمل کرچکی گاڑیوں کو اسکریپ کرنے کی اپیل کی ہے تاکہ ضبطی اور قانونی کارروائی سے بچا جاسکے۔
۔۔۔۔
(ایجنسیاں )
