سری نگر؍۲۸ ستمبر
شمالی کشمیر کے کپواڑہ ضلع کے کرناہ علاقے کے سماری میں پیر کو ایک سومو گاڑی حادثے کا شکار ہوکر گہری کھائی میں جا گری، جس کے نتیجے میں کم از کم پانچ افراد ہلاک جبکہ پانچ دیگر زخمی ہوگئے۔
حکام نے ایک مقامی خبر رساں ایجنسی کو بتایا کہ حادثہ سماری کے مقام پر پیش آیا، جہاں سومو گاڑی گہری کھائی میں جا گری، جس کے نتیجے میں پانچ افراد کی موت ہوگئی اور پانچ دیگر زخمی ہوئے۔
جاں بحق افراد کی شناخت‘محمد ادریس ولد قیصر دین، عمر ۳۲سال‘حمزہ، عمر۹ ماہ، ولد محمد ادریس‘سعیدہ بیگم زوجہ محمد ادریس، عمر۳۰ سال‘شبیر احمد، عمر۷۰ سال‘راجہ ارشاد ولد مجید خان، عمر۲۷ سال۔
قابل ذکر ہے کہ جاں بحق ہونے والوں میں ایک ہی خاندان کے تین افراد شامل ہیں، جن میں ایک سرکاری استاد بھی شامل ہے۔ریسکیو کارروائی جاری ہے، جبکہ زخمیوں کو قریبی اسپتال منتقل کر دیا گیا ہے۔ حادثے کے حوالے سے مزید تفصیلات کا انتظار ہے۔
پولیس نے واقعے کا نوٹس لیتے ہوئے تحقیقات شروع کر دی ہیں۔
ادھرپولیس نے بتایا کہ کٹھوعہ ضلع میں بنی بسوہلی سڑک پر ستاسر علاقے کے قریب ایک کار سڑک سے پھسل کر گہری کھائی میں جا گری، جس کے نتیجے میں کار میں سوار دو افراد ہلاک ہوگئے۔
ہلاک ہونے والوں کی شناخت گبیلش کمار ولد بشمبر داس، ساکن کالوگا رولکا، تحصیل بنی، اور راج کمار ولد بدری ناتھ، ساکن ڈنڈیوت سندرون، تحصیل بنی، کے طور پر ہوئی ہے۔
پولیس حکام کے مطابق حادثہ اتوار اور پیر کی درمیانی شب پیش آیا۔ واقعے کی اطلاع ملنے کے بعد پولیس اور دیگر امدادی ٹیموں نے فوری طور پر بچاؤ کارروائی شروع کی۔
کئی گھنٹوں تک جاری رہنے والی کارروائی کے بعد امدادی ٹیمیں گہری کھائی سے دونوں افراد کی لاشیں نکالنے میں کامیاب ہوگئیں۔
پولیس نے پولیس اسٹیشن بنی میں مقدمہ درج کرلیا ہے اور حادثے کے حالات و وجوہات کی مزید تحقیقات شروع کردی ہیں۔
دریں اثنا، راجوری ضلع کے کنڈی کے منور گالا علاقے میں پیر کو ایک ٹیمپو گاڑی بے قابو ہوکر حادثے کا شکار ہوگئی، جس کے نتیجے میں دو سالہ بچے سمیت سات افراد زخمی ہوگئے۔
ایک افسر نے بتایا کہ حادثہ منور گالا کے قریب پیش آیا، جہاں ٹیمپو گاڑی کے ڈرائیور کا گاڑی پر سے کنٹرول ختم ہوگیا اور گاڑی حادثے کا شکار ہوگئی۔
خبر رساں ایجنسی کے مطابق مقامی لوگوں نے فوری طور پر جائے حادثہ پر پہنچ کر زخمیوں کو نکالا اور انہیں علاج کے لیے گورنمنٹ میڈیکل کالج (جی ایم سی) راجوری منتقل کیا۔
زخمیوں کی شناخت محمد اخلاق(۱۸)‘ محمد شبیر(۳۰)‘ عبدالغفور(۶۵) یاسمین کوثر(۲۵‘برتا دیوی(۲۸)‘ دلجیت سنگھ(۲) اور محمد حنیف(۵۷) کے طور پر ہوئی ہے۔
اس دوران لیفٹیننٹ گورنر منوج سنہا نے کپواڑہ میں پیش آئے ایک المناک سڑک حادثے میں قیمتی جانوں کے ضیاع پر گہرے رنج و غم کا اظہار کیا ہے۔
لیفٹیننٹ گورنر نے ’ایکس‘ پر ایک پوسٹ میں کہا، ’’کپواڑہ میں ایک افسوسناک سڑک حادثے میں قیمتی جانوں کے ضیاع سے مجھے گہرا صدمہ پہنچا ہے۔ سوگوار خاندانوں کے ساتھ میری دلی تعزیت ہے۔ زخمیوں کی جلد صحت یابی کے لیے دعاگو ہوں۔ میں نے ضلعی انتظامیہ کو زخمیوں کو بہترین ممکنہ طبی علاج فراہم کرنے کو یقینی بنانے کی ہدایت دی ہے۔‘‘
دریں اثنا، وزیر اعلیٰ عمر عبداللہ نے بھی ضلع کپواڑہ کے کرناہ ٹنگڈار علاقے کے سیماری میں پیش آئے المناک سڑک حادثے پر گہرے رنج و غم کا اظہار کیا، جس میں پانچ افراد جاں بحق جبکہ متعدد دیگر زخمی ہوئے۔
وزیر اعلیٰ نے سوگوار خاندانوں کے ساتھ دلی تعزیت کا اظہار کرتے ہوئے مرحومین کی ارواح کے لیے ابدی سکون اور متاثرہ خاندانوں کو اس ناقابل تلافی نقصان کو برداشت کرنے کے لیے صبر و حوصلے کی دعا کی۔
وزیر اعلیٰ نے ضلعی انتظامیہ اور طبی حکام کو ہدایت دی کہ حادثے میں زخمی ہونے والے افراد کو بہترین ممکنہ علاج اور تمام ضروری طبی سہولیات فراہم کی جائیں۔انہوں نے متعلقہ حکام کو یہ بھی ہدایت دی کہ متاثرہ خاندانوں کو ہر ممکن مدد اور تعاون فراہم کیا جائے۔
(ویب ڈیسک)
