بڑے میڈیا اداروں کے بائیکاٹ کے درمیان وائٹ ہاؤس ٹرمپ ٹی وی شروع کرے گا

واشنگٹن، 22 ستمبر (اسپوتنک/یو این آئی) وائٹ ہاؤس نے ’ٹرمپ ٹی وی‘ شروع کرنے کا اعلان کیا ہے۔ یہ اعلان ایسے وقت میں سامنے آیا ہے جب امریکہ کے کئی بڑے میڈیا اداروں نے امریکی صدر ڈونالڈ ٹرمپ کی سرگرمیوں کی کوریج کے بائیکاٹ کا اعلان کیا ہے۔
وائٹ ہاؤس کے سرکاری یوٹیوب چینل پر ’’ٹرمپ ٹی وی: دی ایسینشلز اسٹیشن‘‘ کے نام سے ایک لائیو اسٹریم کا اعلان کیا گیا، جو 23:00 جی ایم ٹی پر شروع ہوا۔
ویڈیو کی تفصیل میں کہا گیا ہے، ’’ٹرمپ انتظامیہ کے اہم ترین لمحات سب ایک ہی جگہ دیکھیں۔ اہم ویڈیوز، بڑی تقریریں اور قابلِ ذکر جھلکیاں 24 گھنٹے، ہفتے کے ساتوں دن نشر کی جائیں گی اور انہیں حقیقی وقت میں اپ ڈیٹ کیا جائے گا۔ باخبر رہیں اور تازہ ترین معلومات سے آگاہ رہیں۔‘‘
گزشتہ ہفتے ٹرمپ نے کہا تھا کہ وہ ’سی این این‘، ’ایم ایس ناؤ‘ اور ’پولیٹیکو‘ کے رپورٹرز کو وائٹ ہاؤس سے پابندی عائد کر رہے ہیں اور ان تینوں اداروں کو ’’جعلی‘‘ قرار دیا تھا۔ ان تینوں میڈیا اداروں نے پیر کو کہا کہ وہ وائٹ ہاؤس کی کوریج کے لیے صحافیوں کی منظوری ختم کرنے کے اقدام پر امریکی انتظامیہ کے خلاف مقدمہ دائر کر رہے ہیں۔
ٹرمپ کے اعلان کے جواب میں کئی نشریاتی اداروں نے انتظامیہ پر امریکی آئین کی پہلی ترمیم کی خلاف ورزی کا الزام عائد کیا، جو آزادی اظہار اور آزادی صحافت کی ضمانت دیتی ہے، اور ٹرمپ کی سرگرمیوں کی کوریج کے بائیکاٹ کا اعلان کیا۔
’فاکس نیوز‘، ’اے بی سی‘، ’سی بی ایس‘، ’این بی سی‘، ’دی نیویارک ٹائمز‘ اور ’دی واشنگٹن پوسٹ‘ بائیکاٹ میں شامل ہو گئے ہیں۔