انڈین انڈر 19 ٹیم نے آسٹریلیا کو سات رنز سے ہرایا

راجکوٹ، 18 ستمبر (یو این آئی) یش وردھن چوہان (54 رنز/دو وکٹیں)، انوے ڈیوڈ (38) اور آریہ ویر سہواگ (28) کی شاندار کارکردگی کی بدولت انڈین انڈر 19 ٹیم نے بارش سے متاثرہ پہلے یوتھ ون ڈے میچ میں آسٹریلیا انڈر 19 ٹیم کو سات رنز سے شکست دے دی۔
183 رنز کے ہدف کا تعاقب کرنے اتری آسٹریلیا کے لیے نیل پٹیل اور ہیڈن باربولاوک کی جوڑی نے پہلی وکٹ کے لیے 58 رنز جوڑ کر اچھی شروعات کی۔ ساتویں اوور میں چوہان نے ہیڈن (45) کو آؤٹ کر کے اس شراکت داری کو توڑا۔ اس کے بعد 11 ویں اوور میں چوہان نے نیل پٹیل (40) کو بھی اپنا شکار بنا لیا۔ جیڈ ہولک (25) رنز بنا کر آؤٹ ہوئے۔ کپتان جیک ساسنیک نے 27 گیندوں پر چھ چوکے اور تین چھکے لگاتے ہوئے 55 رنز کی جارحانہ اننگز کھیل کر اپنی ٹیم کو فتح دلانے کی کوشش کی۔ 19 ویں اوور کی پانچویں گیند پر چگورپتی وینکٹا نے ساسنیک کو آؤٹ کر کے آسٹریلیا کی میچ جیتنے کی امیدوں پر پانی پھیر دیا۔ آخری اوورز میں بھارتی گیند بازوں کی بہترین کارکردگی کے آگے آسٹریلیا کے بلے باز سات وکٹوں پر 175 رنز ہی بنا سکے اور ان کی ٹیم مقابلہ سات رنز سے ہار گئی۔
اس سے قبل آج آسٹریلیا کی انڈر 19 ٹیم نے ٹاس جیت کر پہلے گیند بازی کرنے کا فیصلہ کیا۔ پہلے بلے بازی کرتے ہوئے ہندوستان کی انڈر 19 ٹیم کے یش وردھن چوہان نے 34 گیندوں پر پانچ چوکے اور دو چھکے لگاتے ہوئے 54 رنز کی نصف سنچری اننگز کھیلی۔ انوے ڈیوڈ نے 18 گیندوں پر دو چوکے اور تین چھکے لگاتے ہوئے 38 رنز بنائے۔ آریہ ویر سہواگ نے 26 گیندوں پر پانچ چوکے لگاتے ہوئے 28 رنز بنائے۔ انوے ڈیوڈ اور یش وردھن چوہان کے درمیان 34 گیندوں پر 69 رنز کی شراکت داری ہوئی۔ وہیں کُشاگر اوجھا (16)، کپتان لکشے رائے چندانی (15) اور ارجن راجپوت (15) نے اہم تعاون دیا۔ بارش کی وجہ سے میچ کو 20-20 اوورز کا کر دیا گیا تھا۔ بھارتی ٹیم نے چھ وکٹوں پر 182 رنز کا چیلنجنگ اسکور بنایا۔ آسٹریلیا کی جانب سے اسپینسر گرین اور ایلی برین کو دو دو وکٹیں ملیں۔