ستیہ نکیتن حادثے کے متوفین کی تیرھویں سے پہلے مودی کی سالگرہ منانے پر آپ نے بی جے پی کو گھیرا

نئی دہلی، 17 ستمبر (یو این آئی) عام آدمی پارٹی (عآپ) نے ستیہ نکیتن پی جی حادثے میں جان گنوانے والے طلباء کی تیرھویں سے ایک دن پہلے وزیراعظم نریندر مودی کی سالگرہ منائے جانے پر بی جے پی کو نشانہ بنایا ہے۔
عآپ کے دہلی پردیش صدر سوربھ بھاردواج نے جمعرات کو الزام لگایا کہ ستیہ نکیتن میں ماتم کے درمیان بی جے پی وزیراعظم کی سالگرہ دیوالی کی طرح منا رہی ہے۔ انہوں نے کہا کہ 18 ستمبر کو حادثے میں ہلاک طلباء کی تیرھویں ہے اور ایسے وقت جشن منانا بے حسی کو ظاہر کرتا ہے۔ انہوں نے ایکس پر شیئر کی گئی ایک ویڈیو میں کہا کہ چھ ستمبر کو ستیہ نکیتن پی جی میں دہلی یونیورسٹی کے طلباء سمیت سات لوگوں کی موت ہوئی تھی۔ انہوں نے کہا کہ ہندو سناتن رسم کے مطابق 18 ستمبر کو متوفین کی تیرھویں ہونی ہے۔ انہوں نے دعویٰ کیا کہ تیرھویں تک سوتک کا وقت مانا جاتا ہے اور ایسی صورتحال میں وزیراعظم کی سالگرہ پر مسرت و شادمانی سے پروگرام منعقد کرنا مناسب نہیں ہے۔ انہوں نے ہم وطنوں اور دہلی یونیورسٹی کے طلباء سے اس واقعہ پر توجہ دینے کی اپیل کی۔
عآپ لیڈر نے الزام لگایا کہ وزیراعظم کی سالگرہ کے نام پر جگہ جگہ دیے جلانا اور وزیراعلیٰ ریکھا گپتا کے ذریعہ ہون کرنا غم کے ماحول کے برعکس ہے۔ انہوں نے کہا کہ چھ ستمبر کو ستیہ نکیتن میں سات بے قصور لوگوں کی جان گئی تھی، جن میں 18-19 سال کے دہلی یونیورسٹی کے طلباء بھی شامل تھے۔ انہوں نے مذہبی روایتوں کا حوالہ دیتے ہوئے کہا کہ ایسے وقت میں اس طرح کا اہتمام کرنا شرمناک ہے۔