یوتھ فرسٹ میراتھن 20 ستمبر کو منعقد ہوگی

نئی دہلی، 16 ستمبر (یواین آئی) نوجوانوں کی ذہنی صحت اور جذباتی بہبود کے لیے ملک گیر مہم ’یوتھ فرسٹ میراتھن‘ 20 ستمبر کو نئی دہلی کے جواہر لال نہرو اسٹیڈیم میں منعقد ہوگی۔ گلوبل سینٹر فار سوشل ڈائنامک ریسرچ (جی سی ایس ڈی آر) نے گزشتہ سال 20 ستمبر کو وزیراعظم نریندر مودی کی سالگرہ کے موقع پر ’یوتھ فرسٹ مشن‘ کا اعلان کیا تھا۔
مہم کا مقصد نوجوانوں کو ذہنی طور پر مضبوط بنانا اور تعلیمی دباؤ، کیریئر سے متعلق تشویش، خاندانی و سماجی توقعات، رشتوں کے مسائل اور سوشل میڈیا سے پیدا ہونے والے دباؤ کا مثبت اور تعمیری انداز میں سامنا کرنے کے لیے بااختیار بنانا ہے۔ مہم نوجوانوں کو اپنے جذبات کھل کر بیان کرنے، ضرورت کے وقت مدد لینے اور مشکل حالات میں تنہا جدوجہد نہ کرنے کی ترغیب دیتی ہے۔
میراتھن میں سارک ممالک اور پانچ ریاستوں کے نوجوان حصہ لے رہے ہیں۔ راجستھان سے 5,000 نوجوان دہلی پہنچیں گے، جبکہ مہاراشٹر سے 6,962 ہماچل پردیش سے 8,555 نوجوانوں اور گجرات کے 33 ضلعی مراکز سے شرکا نے ورچوئل رن کے لیے رجسٹریشن کرایا ہے۔ جواہر لال نہرو اسٹیڈیم میں تقریباً 10 ہزار سے 12 ہزار نوجوانوں کی شرکت متوقع ہے۔
ڈاکٹر نیلم سی. ڈے، جو اس مشن کی بانی ہیں، نے کہا کہ یہ پہل اسکولوں، کالجوں اور نوجوانوں کے درمیان ذہنی صحت کے لیے محفوظ، معاون اور حساس ماحول کو فروغ دینے پر بھی توجہ مرکوز کرتی ہے۔ مہم کا سرکاری نغمہ ’ہم دیش کے یوا‘ جون 2025 سے 92.7 بگ ایف ایم پر نشر کیا جارہا ہے۔ یوتھ فرسٹ میراتھن کو فٹ انڈیا، ایس اے یو، مختلف ریاستی حکومتوں، بھارت اسکاؤٹس اینڈ گائیڈز اور پرساد بھارتی سمیت متعدد اداروں کی حمایت حاصل ہے۔