جموں؍۱۵ ستمبر
وائٹ نائٹ کور کے جنرل آفیسر کمانڈنگ (جی او سی) لیفٹیننٹ جنرل پی۔ کے۔ مشرا نے منگل کو جموں و کشمیر کے ضلع پونچھ کے سرنکوٹ علاقے میں مختلف آپریشنل مقامات کا دورہ کرکے موجودہ سکیورٹی صورتحال اور جاری انسدادِ دہشت گردی کارروائیوں کا جائزہ لیا۔
جموں میں قائم وائٹ نائٹ کور نے سوشل میڈیا پلیٹ فارم ایکس پر ایک پوسٹ میں بتایا کہ کور کمانڈر کو پیر پنجال سلسلۂ کوہ میں غلبہ برقرار رکھنے کے لیے جاری کارروائیوں، مضبوط مشترکہ انٹیلی جنس نیٹ ورک اور تمام سکیورٹی ایجنسیوں کے درمیان مؤثر تال میل کے بارے میں بریفنگ دی گئی۔
لیفٹیننٹ جنرل پی۔ کے۔ مشرا کے ہمراہ رومیو فورس کے جی او سی بھی تھے، جو پونچھ اور راجوری کے سرحدی اضلاع میں انسدادِ شورش کارروائیوں کی ذمہ دار فورس ہے۔
وائٹ نائٹ کور کے مطابق جی او سی نے تمام متعلقہ اداروں کی پیشہ ورانہ کارکردگی اور غیر متزلزل عزم کو سراہا۔ انہوں نے مشکل جغرافیائی حالات اور موسم کے باوجود مخالف عناصر کو کسی بھی قسم کی عملی سرگرمی کے لیے گنجائش نہ دینے کے مقصد سے جاری مسلسل کارروائیوں کی بھی تعریف کی۔
۔۔۔۔۔۔(ایجنسیاں )
