ہندوستانی خواتین کرکٹ ٹیم نے محسن نقوی سے ایشیا کپ کی ٹرافی لینے سے انکار کیا

نئی دہلی، 14 ستمبر (یو این آئی) ایشیا کپ کی ٹرافی پیش کرنے کے معاملے پر ہندوستان کے موقف کو برقرار رکھتے ہوئے ہندوستانی خواتین کرکٹ ٹیم نے اتوار کو دبئی میں سری لنکا کو فائنل میں 72 رن سے شکست دینے کے بعد ایشیائی کرکٹ کونسل (اے سی سی) کے صدر اور پاکستان کرکٹ بورڈ (پی سی بی) کے سربراہ محسن نقوی سے ٹرافی لینے سے انکار کردیا ہندوستانی ٹیم نے پہلے ہی واضح کردیا تھا کہ وہ نقوی سے ٹرافی پیش نہیں کروانا چاہتی۔ بی سی سی آئی نے دو متبادل پیش کیے تھے، جن میں اے سی سی کے نائب چیئرمین خالد الزرونی کا ٹرافی پیش کرنا یا فاتح بورڈ کے کسی نمائندے کے ذریعے ٹرافی دلوانا شامل تھا، لیکن دونوں تجاویز قبول نہیں کی گئیں۔
میچ کے بعد ٹیم کے موقف کی وضاحت کرتے ہوئے ہندوستان کے ہیڈ کوچ امول مجمدار نے کہا کہ یہ فیصلہ بی سی سی آئی نے لیا تھا اور کھلاڑیوں نے اس کی مکمل حمایت کی۔
مجمدار نے میچ کے بعد پریس کانفرنس میں کہا، ’’یہ موقف بی سی سی آئی نے اختیار کیا ہے اور ہم اس کے ساتھ ہیں۔ ہمارے لیے یہ ٹورنامنٹ ختم ہوچکا ہے۔ ہم چیمپئن ہیں۔ ہمارے لیے یہی کافی ہے۔ بڑے بورڈ پر بھی لکھا گیا تھا کہ ہندوستان 2026 ایشیا کپ کا چیمپئن ہے۔ ہمارے لیے یہ ٹورنامنٹ باضابطہ طور پر ختم ہوچکا ہے۔ ہمیں خوشی ہے کہ ہم چیمپئن بن کر ابھرے ہیں۔ اب ہماری توجہ ایشیائی کھیلوں پر ہے۔‘‘
انہوں نے مزید کہا، ’’اس حقیقت سے کہ ہم چیمپئن ہیں، ہمیں واقعی بہت خوشی ہے اور مجھے اس ٹیم کے ہر ایک فرد پر بہت فخر ہے۔ اس میں معاون عملہ اور کھلاڑی سب شامل ہیں، یہ کہنے کی ضرورت نہیں۔‘‘
نقوی دبئی انٹرنیشنل اسٹیڈیم میں موجود معزز شخصیات میں شامل تھے اور فائنل کے دوران بی سی سی آئی کے نائب صدر راجیو شکلا اور سکریٹری دیواجیت سائکیا کے ساتھ بیٹھے تھے۔
ہندوستان کی جیت کے بعد کھلاڑیوں نے مجمدار، شکلا اور سائکیا کے ساتھ جشن منایا۔ بعد میں نقوی نے سری لنکا کی کپتان چماری اتھاپتھو کو رنر اپ کی رقم کا چیک پیش کیا اور اے سی سی کے دیگر عہدیداروں کے ساتھ میدان سے روانہ ہوگئے۔ ادھر ہندوستان کو تقریب کے دوران نہ تو ٹرافی دی گئی اور نہ ہی فاتح ٹیم کے تمغے دیے گئے۔