جموں؍۱۴ستمبر
جموں و کشمیر کے ریاسی ضلع میں پیر کی صبح ایک منی بس حادثے کا شکار ہوکر الٹ گئی، جس کے نتیجے میں دو افراد ہلاک جبکہ کئی دیگر زخمی ہوگئے۔
حکام کے مطابق منی بس بکل سے ریاسی کی جانب جا رہی تھی کہ بکل ٹنل کے قریب حادثے کا شکار ہوکر الٹ گئی۔ حادثے میں متعدد مسافر زخمی ہوئے۔
پولیس نے مقامی لوگوں کی مدد سے فوری طور پر امدادی کارروائی شروع کی اور زخمیوں کو قریبی اسپتال منتقل کیا۔
حکام نے بتایا کہ ایک شخص کی موقع پر ہی موت ہوگئی، جبکہ ایک اور شدید زخمی مسافر اسپتال منتقل کیے جانے کے دوران دم توڑ گیا۔
حادثے میں زخمی ہونے والے دو مسافروں کو مزید علاج کے لیے گورنمنٹ میڈیکل کالج اینڈ اسپتال، جموں منتقل کیا گیا ہے۔
اس دوران وزیراعلیٰ عمر عبداللہ نے ریاسی ضلع میں پیش آئے ایک المناک سڑک حادثے میں دو افراد کی ہلاکت اور پانچ دیگر کے زخمی ہونے پر گہرے رنج و غم کا اظہار کیا ہے۔
وزیراعلیٰ نے جاں بحق افراد کے اہل خانہ سے دلی تعزیت کا اظہار کرتے ہوئے زخمیوں کو بہترین ممکنہ طبی سہولیات فراہم کرنے کے لیے متعلقہ حکام کو ہدایات جاری کی ہیں۔
یہ حادثہ پیر کے روز ریاسی۔باکل سڑک پر بتل گلہ ٹنل کے قریب اس وقت پیش آیا جب مسافر منی بس حادثے کا شکار ہوگئی۔
حادثے میں دو افراد جاں بحق جبکہ پانچ دیگر زخمی ہوگئے۔ وزیراعلیٰ نے متاثرہ خاندانوں کے ساتھ ہمدردی کا اظہار کرتے ہوئے زخمیوں کے فوری اور مؤثر علاج کو یقینی بنانے پر زور دیا ہے۔
۔۔۔۔۔۔۔ایجنسیاں
