سرینگر؍۸؍اگست
محکمہ دستکاری و ہینڈلوم کشمیر نے کنی ہاما، بڈگام سے تعلق رکھنے والے دو ممتاز بُنکروں منظور احمد حاجم اور فیاض احمد وانی کو کانی بُنائی کے شعبے میں نمایاں خدمات کے اعتراف میں باوقار قومی ہینڈلوم ایوارڈ سے نوازے جانے پر دلی مبارکباد پیش کی ہے۔
دونوں ماہر بُنکروں کو ان کی مشترکہ تخلیق ’’چاند دار کانی شال‘‘ پر یہ قومی اعزاز صدرِ جمہوریہ ہند دروپدی مرمو نے نئی دہلی میں منعقدہ ایک پروقار تقریب کے دوران عطا کیا۔ یہ تقریب قومی ہینڈلوم ڈے کی مناسبت سے منعقد کی گئی تھی۔
محکمہ دستکاری و ہینڈلوم کی جانب سے جاری ایک پریس ریلیز میں ترجمان نے کہا کہ یہ اعزاز منظور احمد حاجم اور فیاض احمد وانی کی کانی بُنائی کے قدیم مقامی فن کے لیے انمول خدمات کا بجا اعتراف ہے۔
ترجمان نے کہا، ’’اس باوقار اعزاز کو حاصل کرکے ان ماہر بُنکروں نے کانی بُنائی کی تکنیک کو دستکاری کے شعبے میں نمایاں مقام دلایا ہے، جس سے اس اعلیٰ قدر و قیمت رکھنے والے روایتی فن کے لیے کاروبار کے نئے مواقع کے دروازے کھلنے کی توقع ہے۔‘‘
محکمہ نے کہا کہ دونوں بُنکروں کی یہ کامیابی نہ صرف کانی بُنائی کے منفرد اور قدیم فن کے لیے باعثِ فخر ہے بلکہ کشمیر کے روایتی دستکاری کے ورثے کو قومی سطح پر مزید فروغ دینے میں بھی اہم کردار ادا کرے گی۔
۔۔۔۔۔۔
ویب ڈیسک
