سرینگر/۸؍اگست
حالیہ بارشوں کے بعد یاترا ٹریک کی بحالی اور دیکھ بھال کے جاری کاموں کے ساتھ ساتھ آئندہ چند دنوں میں خراب موسم کی پیش گوئی کے پیش نظر شری امرناتھ جی یاترا کو۹ اگست سے پہلگام اور بالتل، دونوں راستوں پر عارضی طور پر معطل کر دیا جائے گا۔
۵۷ روزہ سالانہ یاترا؍۳ جولائی کو اننت ناگ ضلع کے چندن واری راستے اور گاندربل ضلع کے بالتل راستے سے بیک وقت شروع ہوئی تھی۔ یاترا کا روایتی چڑی مبارک تقریب کے ساتھ۲۸؍اگست کو اختتام طے ہے۔
ڈویژنل کمشنر کشمیر انشل گرگ نے بتایا کہ جاری یاترا کے دوران اب تک۴ء۸لاکھ سے زیادہ یاتریوں نے مقدس غار میں درشن کیے ہیں۔
گرگ نے کہا، ’’اب تک۴ء۸ لاکھ سے زیادہ یاتری مقدس غار میں درشن کر چکے ہیں۔ تاہم حالیہ بارشوں کے باعث یاترا ٹریک کے حساس مقامات پر مرمت اور دیکھ بھال کی ضرورت محسوس ہوئی ہے۔ بحالی کا کام بارڈر روڈز آرگنائزیشن (بی آر او) انجام دے رہی ہے۔‘‘
صوبائی کمشنر نے مزید کہا کہ یاترا معطل کرنے کا فیصلہ آئندہ چند دنوں کے لیے محکمہ موسمیات (آئی ایم ڈی) کی جانب سے جاری کی گئی موسم کی پیش گوئی کو مدنظر رکھتے ہوئے بھی کیا گیا ہے۔
ڈویژنل کمشنر نے کہا، ’’آئی ایم ڈی نے آئندہ چند دنوں کے دوران خراب موسمی حالات کی پیش گوئی کی ہے۔ لہٰذا۹؍ اگست۲۰۲۶ سے دونوں راستوں پر یاترا معطل رہے گی۔‘‘
گرگ نے مزید بتایا کہ روایتی چڑی مبارک جلوس پہلگام کے راستے سے آگے بڑھے گا اور۲۸؍ اگست کو شری امرناتھ یاترا کے باقاعدہ اختتام کی علامت بنے گا۔انہوں نے تمام یاتریوں سے اپیل کی کہ وہ وقتاً فوقتاً مجاز حکام کی جانب سے جاری کردہ ہدایات اور مشوروں پر سختی سے عمل کریں۔ انہوں نے زور دیا کہ یاترا کو محفوظ اور خوش اسلوبی سے جاری رکھنے کے لیے حفاظتی رہنما اصولوں کی پابندی انتہائی ضروری ہے۔
۔۔۔۔۔۔۔۔(ایجنسیاں )
