اجنکیا رہانے یورپیئن ٹی-20 پریمیئر لیگ میں ایمسٹرڈیم فلیمز کے’ مارکی پلیئر ‘ بن گئے

ایمسٹرڈیم (نیدرلینڈز)، 7 اگست (یو این آئی) ہندوستانی ٹیم کے سابق کپتان اجنکیا رہانے یورپیئن ٹی-20 پریمیئر لیگ (ای ٹی پی ایل) کے پہلے سیزن کے لیے ایمسٹرڈیم فلیمز کے ساتھ بطور مارکی پلیئر منسلک ہو گئے ہیں۔ بین الاقوامی کرکٹ اور آئی پی ایل سے ریٹائرمنٹ کے آٹھ دن بعد جمعہ کو اس معاہدے کا اعلان کیا گیا۔
رہانے بنیادی طور پر ٹیسٹ کرکٹ میں اپنی شاندار کارکردگی کے لیے جانے جاتے ہیں، تاہم ٹی-20 کرکٹ میں بھی ان کے پاس 308 میچوں کا وسیع تجربہ ہے۔ انہوں نے اس فارمیٹ میں 30.29 کی اوسط اور 126.77 کے اسٹرائیک ریٹ سے 7968 رنز بنائے، جن میں 56 نصف سنچریاں اور دو سنچریاں شامل ہیں۔
ای ٹی پی ایل میں شمولیت پر رہانے نے کہا، ’’کرکٹ نے مجھے بہت کچھ دیا ہے اور میرا ہمیشہ یہ ماننا رہا ہے کہ کھلاڑیوں کی ذمہ داری ہے کہ وہ اس کھیل کو اس سے بہتر حالت میں چھوڑیں، جیسا انہیں ملا تھا۔ یورپ کرکٹ کے حوالے سے ایک نئے اور دلچسپ دور میں داخل ہو رہا ہے اور اس میں دنیا کے ابھرتے ہوئے اہم کرکٹ مراکز میں شامل ہونے کی بھرپور صلاحیت موجود ہے۔‘‘
انہوں نے کہا، ’’ایمسٹرڈیم فلیمز کی جس بات نے مجھے سب سے زیادہ متاثر کیا، وہ میدان کے اندر اور باہر دیرپا اثرات مرتب کرنے والی ایک مضبوط فرنچائز بنانے کا اس کا وژن ہے۔ میں انتظامیہ کے ساتھ مل کر نہ صرف ایک کامیاب فرنچائز کی تشکیل بلکہ نئی نسل کو ترغیب دینے اور پورے یورپ میں کرکٹ کے مستقبل کو مستحکم بنانے کے لیے کام کرنے کا منتظر ہوں۔‘‘