زیادہ سے زیادہ بچے کھیلوں میں حصہ لیں گے تو مستقبل کے چیمپئن بننے کے امکانات بھی اتنے ہی بڑھیں گے: نیرج چوپڑا

نئی دہلی، 7 اگست (یو این آئی) نوجوانوں کے آئیکون نیرج چوپڑا نے گراس روٹ کھیلوں کے فروغ کے لیے اپنی وابستگی کو مزید مضبوط کرتے ہوئے یو بی ایس ایتھلیٹکس کڈز کپ کے شریک مالک بننے کا اعلان کیا ہے۔ وہ گزشتہ دو سیزن سے اس پروگرام کے سفیر کے طور پر وابستہ تھے۔ شریک مالک بننے کا ان کا یہ قدم ملک بھر کے زیادہ سے زیادہ بچوں کو کھیلوں اور فعال طرز زندگی اختیار کرنے کی ترغیب دینے کے ان کے وژن کی عکاسی کرتا ہے۔
یو بی ایس ایتھلیٹکس کڈز کپ ملک کی سب سے بڑی گراس روٹ کھیلوں کی مہمات میں سے ایک ہے، جس کا مقصد دلچسپ، جامع اور آسان مقابلوں کے ذریعے بچوں کو کھیلوں سے جوڑنا ہے۔ اس پروگرام کے تحت پانچ شہروں کے ڈھائی ہزار سے زائد اسکولوں کے ڈھائی لاکھ سے زیادہ بچوں کو شامل کیا جا چکا ہے۔
نیرج چوپڑا نے کہا، ’’گزشتہ دو سیزن کے دوران میں نے دیکھا ہے کہ یو بی ایس ایتھلیٹکس کڈز کپ نے اسکولوں میں بچوں پر کتنا مثبت اثر ڈالا ہے۔ ہر بچے کو اپنی صلاحیتوں کو دریافت کرنے اور ان کا مظاہرہ کرنے کا موقع ملنا چاہیے، اور شریک مالک بننا میرے لیے ایک فطری اگلا قدم تھا کیونکہ مجھے اس وژن پر پورا یقین ہے جسے ہم مل کر حقیقت کا روپ دے رہے ہیں۔‘‘
انہوں نے کہا، ’’ہمارا ہدف دس لاکھ بچوں تک پہنچنا اور مزید نوجوانوں کو کھیلوں کی جانب راغب کرنا ہے۔ میں بچوں، اساتذہ اور اسکولوں کے ساتھ اپنے تجربات بانٹنے کا منتظر ہوں، کیونکہ جتنے زیادہ بچے کھیلوں میں حصہ لیں گے، مستقبل کے چیمپئن بننے کے امکانات بھی اتنے ہی زیادہ ہوں گے۔‘‘