سرینگر؍ ۶ ؍اگست
جموں و کشمیر کے محکمہ جنگلات کے افسران کے لیے ۱۳ برس بعد باوقار انڈین فاریسٹ سروس (آئی ایف ایس) میں ترقی کے ذریعے شمولیت کا راستہ ہموار ہوگیا ہے۔ مرکزی وزارتِ ماحولیات، جنگلات و موسمیاتی تبدیلی نے اے جی ایم یو ٹی کیڈر کے جموں و کشمیر حصے کے لیے ترقی کے کوٹے میں ۲۸ اسامیاں مقرر کر دی ہیں۔
جموں و کشمیر کے چیف سیکریٹری کو ارسال کردہ ایک مکتوب میں وزارت نے اے جی ایم یو ٹی کیڈر کے جموں و کشمیر حصے کے ترقیاتی کوٹے کے تحت ان آسامیوں کی منظوری کی تصدیق کی ہے۔
خط کے مطابق ۲۰۱۳ کی سلیکٹ لسٹ کے لیے ۱۴، ۲۰۱۷ کے لیے ۲، ۲۰۱۸ کے لیے ۶، ۲۰۱۹ کے لیے ۳ جبکہ ۲۰۲۰، ۲۰۲۱ اور ۲۰۲۳ کے لیے ایک، ایک آسامی مختص کی گئی ہے۔
وزارت نے جموں و کشمیر انتظامیہ کو ہدایت دی ہے کہ وہ انڈین فاریسٹ سروس (اپائنٹمنٹ بائے پروموشن) ریگولیشنز، ۱۹۶۶ کے تحت ضروری کارروائی مکمل کرتے ہوئے یونین پبلک سروس کمیشن (یو پی ایس سی) کو سلیکشن کمیٹی اجلاس منعقد کرنے کے لیے تجویز ارسال کرے تاکہ متعلقہ برسوں کی سلیکٹ لسٹیں تیار کی جا سکیں۔
واضح رہے کہ گزشتہ ۱۳ برسوں سے جموں و کشمیر کے مقامی افسران کی آئی ایف ایس میں ترقی کا عمل اس وجہ سے رکا ہوا تھا کہ یہاں تسلیم شدہ اسٹیٹ فاریسٹ سروس موجود نہیں تھی۔
مرکزی وزارتِ ماحولیات نے اس معاملے کا جائزہ لینے کے بعد قرار دیا کہ جموں و کشمیر فاریسٹ (گزٹیڈ) سروس (ٹریٹوریل) ہی وہ سروس ہے جو بھرتی، تربیت اور دیگر تقاضوں کے لحاظ سے آئی ایف ایس میں ترقی کے لیے مقررہ معیار پر پورا اترتی ہے۔
قابلِ ذکر ہے کہ انڈین فاریسٹ سروس میں بھرتی دو طریقوں سے کی جاتی ہے۔ ۶۶ فیصد اسامیاں یو پی ایس سی کے ذریعے براہِ راست بھری جاتی ہیں، جبکہ باقی ۳۳ فیصد اسامیاں اہل اسٹیٹ فاریسٹ سروس افسران کو ترقی دے کر پُر کی جاتی ہیں۔
ایجنسیاں
