ایجنسیاں
جموں؍ ۴ ؍اگست
جموںکشمیر کے ضلع کٹھوعہ میں منشیات کی اسمگلنگ میں مبینہ ملوث ہونے پر ایک پولیس اہلکار کو ملازمت سے برطرف کر دیا گیا ہے۔ پولیس نے منگل کو یہ اطلاع دی۔
پولیس کے ترجمان کے مطابق منشیات کے خلاف زیرو ٹالرنس پالیسی پر عمل کرتے ہوئے سینئر سپرنٹنڈنٹ آف پولیس (ایس ایس پی) کٹھوعہ موہیتا شرما نے ضلع ریاسی کے رہائشی سلیکشن گریڈ کانسٹیبل آفتاب احمد کو ملازمت سے برطرف کرنے کے احکامات جاری کیے۔
ترجمان نے بتایا کہ یہ کارروائی رواں سال بلوار پولیس اسٹیشن میں نارکوٹک ڈرگز اینڈ سائیکوٹروپک سبسٹنسز (این ڈی پی ایس) ایکٹ کی مختلف دفعات کے تحت درج ایک مقدمے کے سلسلے میں کی گئی محکمانہ انکوائری کی بنیاد پر عمل میں لائی گئی۔
پولیس ترجمان نے کہا کہ مذکورہ پولیس اہلکار کو پولیس پارٹی نے چیکنگ کے دوران ہیروئن سمیت گرفتار کیا تھا، جس کے بعد ۸ اپریل کو اسے سنگین بدعنوانی اور محکمانہ نظم و ضبط کی خلاف ورزی کے الزام میں فوری طور پر معطل کر دیا گیا تھا۔
ترجمان کے مطابق اس کے خلاف محکمانہ انکوائری بھی شروع کی گئی، جس کی ذمہ داری سپرنٹنڈنٹ آف پولیس (آپریشنز) کو سونپی گئی۔ انکوائری افسر نے ۲۷ جولائی کو اپنی رپورٹ پیش کرتے ہوئے ملزم کے خلاف الزامات کو درست قرار دیا اور اسے ملازمت سے برطرف کرنے کی سفارش کی۔
پولیس ترجمان نے بتایا کہ جموں و کشمیر پولیس رولز کی دفعہ ۳۳۵ کے تحت ایس ایس پی کٹھوعہ نے آفتاب احمد کو فوری طور پر ملازمت سے برطرف کرنے کے احکامات جاری کیے، تاکہ محکمانہ نظم و ضبط کو یقینی بنایا جا سکے اور منشیات سے متعلق جرائم میں ملوث ہونے والوں کے لیے ایک مؤثر مثال قائم کی جا سکے۔ (ایجنسیاں)
