ایجنسیاں
سرینگر؍ یکم اگست
جنوبی کشمیر کے ضلع کولگام میں جمعہ کی شام دہشت گردانہ حملے میں زخمی ہونے والا غیر مقامی مزدور ہفتہ کے روز زخموں کی تاب نہ لاتے ہوئے دم توڑ گیا، جس کے بعد حملے میں ہلاک ہونے والوں کی تعداد بڑھ کر دو ہو گئی۔
حکام کے مطابق جاں بحق ہونے والے مزدور کی شناخت بھوپیندر، ساکن چھتیس گڑھ، کے طور پر ہوئی ہے۔ اسے جمعہ کی شب سینے میں گولیاں لگنے کے بعد علاج کے لیے سرینگر کے ایک اسپتال منتقل کیا گیا تھا، جہاں وہ دورانِ علاج چل بسا۔
اس سے قبل اسی حملے میں دیپک نامی ایک اور غیر مقامی مزدور، جو چھتیس گڑھ کا ہی رہائشی تھا، موقع پر ہی جاں بحق ہوگیا تھا۔
حکام نے بتایا کہ دونوں مقتولین کی عمریں بیس برس کے لگ بھگ تھیں اور وہ روزگار کے سلسلے میں جموں و کشمیر آئے ہوئے تھے۔
یہ حملہ گزشتہ دس دنوں کے دوران کشمیر میں پیش آنے والا دوسرا بڑا دہشت گردانہ واقعہ ہے۔ اس سے قبل دہشت گردوں نے ضلع اننت ناگ کے لال چوک علاقے میں جموں و کشمیر پولیس کے ایک افسر کو گولی مار کر شہید کر دیا تھا۔
واضح رہے کہ سال۲۰۲۴ میں بھی سرینگر کے شہید گنج علاقے میں دہشت گردوں نے پنجاب سے تعلق رکھنے والے دو غیر مقامی مزدوروں، امرت پال سنگھ اور روہت مسیح، کو گولی مار کر ہلاک کر دیا تھا۔
