ایجنسیاں
جموں؍ یکم اگست
جموں و کشمیر کے ضلع ریاسی میں پولیس نے ایک مبینہ منشیات فروش کو منشیات اور نفسیاتی اثر رکھنے والے مادّوں کی غیر قانونی اسمگلنگ کی روک تھام سے متعلق قانون (پی آئی ٹی-این ڈی پی ایس ایکٹ) کے تحت حراست میں لے لیا۔
پولیس کے ایک ترجمان کے مطابق گرفتار ملزم کی شناخت پرکاش سنگھ ولد ساکن گاؤں تھلو کے طور پر ہوئی ہے، جو مسلسل منشیات کی اسمگلنگ میں ملوث رہا ہے۔
ترجمان نے بتایا کہ ملزم کے خلاف رواں سال دو ایف آئی آر درج کی جا چکی ہیں اور اس کے خلاف متعدد احتیاطی اقدامات بھی کیے گئے، تاہم اس کے باوجود وہ منشیات کی غیر قانونی سرگرمیوں میں ملوث رہا۔
ملزم کی مسلسل مجرمانہ سرگرمیوں کو مدنظر رکھتے ہوئے جموں کے ڈویژنل کمشنر نے حال ہی میں پی آئی ٹی-این ڈی پی ایس ایکٹ کے تحت اس کی احتیاطی نظر بندی کے احکامات جاری کیے تھے۔
پولیس کے مطابق مذکورہ حکم پر عمل درآمد کرتے ہوئے پرکاش سنگھ کو حراست میں لے کر ضلع جیل پونچھ منتقل کر دیا گیا ہے۔
