ایجنسیز
جموں؍۱۱جون
جموںسرینگر قومی شاہراہ پر مرمتی اور ری سرفیسنگ کے کاموں کے پیش نظر رات کے وقت ٹریفک کی نقل و حرکت عارضی طور پر معطل رہے گی۔
سرکاری حکام کے مطابق ضلع رام بن میں شاہراہ کے مختلف مقامات پر جاری مرمتی کاموں کو مکمل کرنے کیلئے۱۲جون سے متعدد راتوں کے دوران ناشری اور نوی یُگ ٹنل کے درمیان ٹریفک مکمل طور پر بند رکھی جائے گی۔
سرکاری حکم نامے کے مطابق۱۲؍اور۱۳ جون‘۱۴؍۱۵ جون، نیز۱۶؍اور۱۷جون کی درمیانی راتوں میں رات۱۰بجے سے صبح 5بجے تک اس حصے میں ہر قسم کی ٹریفک کی آمد و رفت معطل رہے گی۔
حکام نے بتایا کہ ضلع مجسٹریٹ رام بن نے۳ جولائی سے شروع ہونے والی سالانہ امرناتھ یاترا سے قبل سڑکوں کی مرمت اور بہتری کے کام انجام دینے کے لیے متعلقہ ایجنسیوں کو اجازت فراہم کی ہے۔
انتظامیہ نے مسافروں اور ٹرانسپورٹروں سے اپیل کی ہے کہ وہ مذکورہ اوقات کے دوران اپنے سفر کی منصوبہ بندی اسی مناسبت سے کریں تاکہ کسی بھی قسم کی پریشانی سے بچا جا سکے۔
