مودی کے وزیر اعظم کے طور پر سب سے طویل عرصے تک مسلسل ملک کی خدمت کرنے پر بی جے پی لیڈروں نے مختلف مندروں میں کی پوجا ارچنا

نئی دہلی، 10 جون (یواین آئی) وزیر اعظم نریندر مودی کے وزیر اعظم کے طور پر سب سے طویل عرصے تک ملک کی مسلسل خدمت کرنے کا اعزاز حاصل کرنے پر بھارتیہ جنتا پارٹی (بی جے پی) کے قومی صدر نتن نبین اور پارٹی کے سابق صدر اور مرکزی وزیر صحت اور خاندانی بہبود مسٹر جے پی نڈّا سمیت مختلف لیڈروں نے یہاں الگ الگ مندروں میں پوجا ارچنا کرکے وزیر اعظم کی طویل عمری کی تمنا کی۔
مسٹر نبین بدھ کو دہلی بی جے پی کے صدر اور مرکزی وزیر مملکت ہرش ملہوترا اور رکن پارلیمنٹ محترمہ بانسری سوراج کے ساتھ یہاں کے جھنڈے والان مندر پہنچے اور دیوی کی پوجا ارچنا کر کے مسٹر مودی کے صحت مند اورانکی طویل عمرکی دعا کی۔ مسٹر نبین نے سوشل میڈیا ایکس پر لکھا، "مسٹر نریندر مودی کے منتخب وزیر اعظم کے طور پر مسلسل سب سے طویل عرصے تک خدمت کرنے والے وزیر اعظم بننے کے تاریخی موقع پر یہاں کے مشہور جھنڈے والان دیوی مندر میں آدی شکتی ماں بھگوتی کی باقاعدہ پوجا ارچنا کی۔ اس مقدس موقع پر ماں کے قدموں میں عقیدت کے ساتھ سر جھکاتے ہوئے میں نے وزیر اعظم کی طویل عمری اور بہتر صحت کے لیے دعا کی۔”
مسٹر نڈّا نے محترمہ کمل جیت سہراوت کے ساتھ یہاں واقع برلا مندر میں جا کر پوجا ارچنا کی، جبکہ وزیر ریل اشونی ویشنو نے یہاں کے لودھی روڈ پر واقع سائی بابا مندر میں جا کر پوجا ارچنا کی۔ انہوں نے کہا، "اس پاون دن پر بگھوان سے یہی پرارتھنا ہے کہ وزیر اعظم نریندر مودی اسی طرح ملک کی انتھک خدمت کرتے رہیں اور 140 کروڑ ہم وطنوں کا وکست بھارت کا عزم پورا ہو۔”
اس موقع پر بی جے پی کے قومی جنرل سکریٹری ارون سنگھ اور راجیہ سبھا رکن پارلیمنٹ محترمہ سواتی مالیوال نئی دہلی میں واقع مہارشی بالمیکی مندر پہنچے اور مسٹر مودی کی طویل اور کامیاب مدت کار کے لیے دعا کی۔ اس کے علاوہ شمال مشرقی دہلی سے رکن پارلیمنٹ منوج تیواری نے بابر پور کے کردم پوری میں واقع شیو مندر میں پوجا ارچنا کر کے وزیر اعظم کی طویل عمری کی خواہش کی۔ دہلی بی جے پی کی جنرل سکریٹری اور رکن پارلیمنٹ محترمہ کمل جیت سہراوت آج مقامی مہیلا منڈل اور بی جے پی کارکنوں کی طرف سے دوارکا کے امبرہائی گاؤں میں واقع شیو مندر میں منعقدہ سنکیرتن میں شامل ہوئیں۔ دہلی بی جے پی کے سابق صدر ستیش اپادھیائے نے مالویہ نگر میں شنکر بھگوان کی پوجا ارچنا کی اور مسٹر مودی کی طویل عمری اور ان کی طویل کامیاب قیادت کے لیے دعا کی۔
جنوبی دہلی سے رکن پارلیمنٹ رام ویر سنگھ بدھوڑی نے جنوبی دہلی کے گھٹورنی میں واقع شیو مندر میں بھگوان شنکر کی پوجا ارچنا کی۔ اس کے علاوہ مختلف ریاستوں میں بھی بی جے پی لیڈروں نے الگ الگ مندروں میں جا کر پوجا ارچنا کی اور مسٹر مودی کے صحت مند رہنے اور طویل عمر ہونے کی تمنا کی۔