ویب ڈیسک
سرینگر؍۹ جون
جموں کشمیر پولیس نے منشیات کی اسمگلنگ کے خلاف جاری مہم کے تحت اننت ناگ، سوپور، پلوامہ اور بارہمولہ اضلاع میں الگ الگ کارروائیوں کے دوران چار مبینہ منشیات فروشوں کو گرفتار کرکے ان کے قبضے سے ہیروئن، چرس نما مادہ اور نفسیاتی ادویات برآمد کی ہیں۔
پولیس ترجمان کے مطابق اننت ناگ میں جنرل بس اسٹینڈ پولیس پوسٹ کی ایک ٹیم نے معمول کی گشت کے دوران بس اسٹینڈ علاقے میں ایک مشتبہ شخص کو روکنے کی کوشش کی، تاہم اس نے پولیس کو دیکھ کر فرار ہونے کی کوشش کی۔
پولیس نے فوری کارروائی کرتے ہوئے اسے گرفتار کر لیا۔ گرفتار شخص کی شناخت ارشد احمد صوفی ولد عبدالاحد صوفی ساکن کنیلوان کے طور پر ہوئی ہے۔ اس کے قبضے سے ہیروئن برآمد کی گئی۔ اس سلسلے میں پولیس اسٹیشن اننت ناگ میں ایک ایف آئی آر درج کرکے تحقیقات شروع کر دی گئی ہے۔
سوپور میں پولیس پوسٹ واٹرگام کے دائرہ اختیار میں حب ڈینجرپورہ کراسنگ پر ناکہ چیکنگ کے دوران ایک مشتبہ شخص کو روک کر اس کی تلاشی لی گئی، جس کے دوران اس کے قبضے سے چرس نما مادہ برآمد ہوا۔ ملزم کی شناخت عامر نذیر تانترے ولد نذیر احمد تانترے ساکن گنڈ براتھ سوپور کے طور پر ہوئی ہے۔ اس ضمن میں پولیس اسٹیشن ڈانگی واچھہ میںایک ایف آئی آر درج کر کے مزید تحقیقات شروع کی گئی ہیں۔
پلوامہ میں پولیس اسٹیشن کاکہ پورہ کی ٹیم نے ریلوے روڈ پر ناکہ چیکنگ کے دوران عمر فاروق لون ولد فاروق احمد لون ساکن نہامہ کو گرفتار کیا۔ پولیس کے مطابق ملزم نے فرار ہونے کی کوشش کے دوران ایک نائیلون بیگ پھینک دیا، جس سے تقریباً۱ء۵۳کلوگرام چرس نما مادہ (بنگ بوسہ) برآمد کیا گیا۔ اس سلسلے میں ایک ایف آئی آر درج کر کے تحقیقات شروع کر دی گئی ہے۔
دریں اثنا، بارہمولہ کے کنزر علاقے میں پولیس نے ایک بدنام زمانہ منشیات فروش کو گرفتار کرکے اس کے قبضے سے نفسیاتی اثر رکھنے والی ادویات برآمد کی ہیں۔
پولیس کے مطابق کنزر بازار میں گورنمنٹ گرلز ہائی اسکول کے قریب گشت پر مامور پولیس پارٹی نے ایک مشتبہ شخص کو دیکھا، جو پولیس کو دیکھتے ہی فرار ہونے کی کوشش کرنے لگا۔ پولیس نے تعاقب کرکے اسے گرفتار کر لیا۔
گرفتار شخص کی شناخت خالد بن احد صوفی ولد عبدالاحد صوفی ساکن گوکھامہ کے طور پر ہوئی ہے۔ اس کی ذاتی تلاشی کے دوران ٹراماڈول ہائیڈروکلورائیڈ کی۹گولیوں پر مشتمل ایک پٹی برآمد کی گئی۔ اس سلسلے میں پولیس اسٹیشن کنزر میں ایک ایف آئی آر درج کرکے مزید تحقیقات شروع کر دی گئی ہے۔
پولیس کے مطابق گرفتار ملزم علاقے میں منشیات فروشی کی سرگرمیوں میں ملوث ایک معروف اسمگلر ہے۔
جموں و کشمیر پولیس نے منشیات کے خلاف اپنی زیرو ٹالرنس پالیسی کا اعادہ کرتے ہوئے کہا ہے کہ منشیات کے نیٹ ورک کو جڑ سے ختم کرنے اور معاشرے کو اس لعنت سے محفوظ رکھنے کے لیے کارروائیاں مستقبل میں بھی جاری رہیں گی۔ پولیس نے عوام سے بھی اپیل کی ہے کہ وہ منشیات کے خلاف اس مہم میں مکمل تعاون جاری رکھیں۔
